នៅថ្ងៃទី ០៧ ខែកក្កដា ឆ្នាំ ២០២៥ លោកដូណាល់ត្រាំ ប្រធានាធិបតីអាមេរិក បានសម្រេចយកពន្ធគយបដិការលើប្រទេសដៃគូពាណិជ្ជកម្មចំនួន ១៤ ខណៈអត្រាពន្ធថ្មីនេះ នឹងចាប់ផ្ដើមចូលជាធរមាននៅថ្ងៃទី ១ ខែសីហា ឆ្នាំ ២០២៥ ខាងមុខនេះ។ នេះបើតាមការឱ្យដឹងពីប្រភព White House។
ក្នុងនោះ ចំពោះការសម្រេចយកពន្ធគយបដិការលើប្រទេសដៃគូពាណិជ្ជកម្មចំនួន ១៤ មានដូចជា ៖
– កម្ពុជា ៣៦%,
– ឥណ្ឌូណេស៊ី ៣២%
– ថៃ ៣៦%
– មីយ៉ាន់ម៉ា ៤០%
– ឡាវ ៤០%
– ម៉ាឡេស៊ី ២៥%
– បង់ក្លាដែស ៣៥%
– ជប៉ុន ២៥%
– សាធារណរដ្ឋកូរ៉េ ២៥%
– ទុយនេស៊ី ២៥%
– កាហ្សាក់ស្ថាន ២៥%
– អាហ្វ្រិកខាងត្បូង ៣០%
– ស៊ែប៊ី ៣៥%
– បូស្នៀ និង ហឺហ្សេហ្គោវីណា ៣០%។
តាមរយៈការប្រកាសយកពន្ធរបស់អាមេរិកនៅថ្ងៃនេះ លោក Casey Barnett ប្រធានសភាពាណិជ្ជកម្មអាមេរិកប្រចាំនៅកម្ពុជា បានមានប្រសាសន៍ឱ្យដឹងថា ៖ «កម្ពុជាមានការកាត់បន្ថយអត្រាពន្ធច្រើនជាងគេក្នុងចំណោមប្រទេសទាំង ១៤។ ភាពប្រសើរឡើងរបស់កម្ពុជា គឺដោយសារការចូលរួមយ៉ាងសកម្មជាមួយតំណាងពាណិជ្ជកម្មសហរដ្ឋអាមេរិក។ បច្ចុប្បន្នកម្ពុជាខិតជិតដៃគូប្រកួតប្រជែងសំខាន់របស់ខ្លួន គឺបង់ក្លាដែស និងឥណ្ឌូនេស៊ី។ ប៉ុន្តែកម្ពុជានៅពីក្រោយប្រទេសវៀតណាមដែលមានអត្រា ២០%។ វៀតណាមបានផ្តល់សិទ្ធិចូលទីផ្សារវៀតណាមដោយគ្មានពន្ធដល់អាមេរិក។ រោងចក្រមួយចំនួននៅកម្ពុជាឥឡូវនេះកំពុងសម្លឹងមើលប្រទេសក្រៅអាស៊ី ដូចជាអេហ្ស៊ីប ដែលមានតម្លៃពលកម្មទាប ប៉ុន្តែមានតែពន្ធអាមេរិក ១០% ប៉ុណ្ណោះ»៕
