ជម្លោះព្រំដែនកម្ពុជា-ថៃ បាន និង កំពុងធ្វើឱ្យប៉ះពាល់យ៉ាងខ្លាំងដល់ការរស់នៅរបស់ប្រជាជននៅតាមបណ្ដាព្រំដែន ក៏ដូចជាកងកម្លាំងរបស់កម្ពុជាយើង។ បើយោងតាមប្រសាសន៍ សម្តេចតេជោ ហ៊ុន សែន ប្រធានព្រឹទ្ធសភា ដែលបានថ្លែងការណ៍ចេញពីព្រឹទ្ធសភាកាលពីកន្លងទៅ បានអំពាវនាវដល់ប្រជាពលរដ្ឋទាំងអស់ ឱ្យចូលរួមឧបត្ថម្ភតាមការស្ម័គ្រចិត្តដល់កងទ័ព ដើម្បីបង្ហាញពីភាពរួបរួមគ្នាជាធ្លុងមួយនៃខឿនការពារជាតិរបស់កម្ពុជា។
ដើម្បីឆ្លើយតបតាមការអំពាវនាវរបស់ថ្នាក់ដឹកនាំកម្ពុជា ក្រុមហ៊ុនភេសជ្ជៈប៉ូវកម្លាំង បាកាស ក៏បានប្រកាសឧបត្ថម្ភថវិកា ១០០ ០០០ ដុល្លារ (១០ ម៉ឺនដុល្លារ) បន្ថែមជួយដល់កងទ័ពជួរមុខកម្ពុជា ដែលកំពុងឈរជើងយ៉ាងអង់អាចនៅតាមបណ្តោយព្រំដែនកម្ពុជា-ថៃ។
ការចូលរួមឧបត្ថម្ភថវិកាដោយស្ម័គ្រចិត្តរបស់ ក្រុមហ៊ុនភេសជ្ជៈប៉ូវកម្លាំង បាកាស គឺជាការចូលរួមចំណែកលើកទឹកចិត្តដ៏ល្អមួយ ជូនដល់កងទ័ពកម្ពុជាដ៏អង់អាចក្លាហានរបស់យើង ដែលពេលនេះកំពុងឈរជើងជាប់ជាប្រចាំដើម្បីការពារបូរណភាពទឹកដី នៅតាមបណ្តោយព្រំដែនកម្ពុជា-ថៃ។
ស្របជាមួយនឹងការចូលរួមចំណែកជាថវិកាចំនួន ១០ ម៉ឺនដុល្លារនេះដែរ ក្រុមហ៊ុនភេសជ្ជៈប៉ូវកម្លាំងបាកាស សូមបង្ហាញស្មារតីកោតសរសើរ និង គោរពចំពោះភាពមោះមុត អង់អាចក្លាហាន របស់វីរកងទ័ពជួរមុខកម្ពុជាទាំងអស់ ដែលបានលះបង់សាច់ស្រស់ ឈាមស្រស់ ប្រយុទ្ធតតាំងជាមួយសត្រូវនៅសមរភូមិមុខ ហើយក៏សូមបួងសួងឱ្យវត្ថុស័ក្តិសិទ្ធិទាំងឡាយជួយតាមថែរក្សាកងទ័ពកម្ពុជាទាំងអស់ឱ្យទទួលបានជោគជ័យគ្រប់ភារកិច្ច៕
