បុគ្គល ៣ រូប ផ្តើមរកស៊ីក្នុងទ.វ ៩០ ដូចគ្នា បច្ចុប្បន្នក្លាយជាម្ចាស់ក្រុមហ៊ុនយក្ស និង មហាសេដ្ឋីនៅកម្ពុជា

ចាប់ផ្តើមរកស៊ីក្នុងទ.វ ៩០ បើកគិតមកទល់ពេលបច្ចុប្បន្ន មានរយៈពេលប្រមាណជាង ៣០ ឆ្នាំមកហើយ។ ចំណោមបុគ្គលរកស៊ីជោគជ័យល្បីៗ យើងសូមលើកពីបុគ្គល ៣ រូប ដែលពួកគេសុទ្ធតែចាប់ផ្តើមប្រឡូកវិស័យជំនួញក្នុងទ.វ ៩០ ហើយបច្ចុប្បន្នម្នាក់ៗសុទ្ធតែក្លាយជាម្ចាស់ក្រុមហ៊ុនយក្ស ជាថ្នាក់ដឹកនាំកំពូល ហើយក៏អាចហៅថា ជាមហាសេដ្ឋីនៅកម្ពុជាផងដែរ។

១. អ្នកឧកញ៉ា ថៃ ជាហួត 

អ្នកឧកញ៉ា ថៃ ជាហួត កើតក្នុងឆ្នាំ ១៩៧០ នៅខេត្តកំពង់ចាម។ លោកបានចូលប្រឡូកក្នុងវិស័យជំនួញតាំងពីទសវត្សរ៍ឆ្នាំ ១៩៩០ មកម៉្លេះ។ អ្នកឧកញ៉ា ថៃ ជាហួត ក៏មានតួនាទីជាអនុប្រធានសមាគមឧកញ៉ាកម្ពុជាផងដែរ។ បច្ចុប្បន្ន អ្នកឧកញ៉ា គឺជាស្ថាបនិក និង ជាប្រធានក្រុមប្រឹក្សាភិបាល ក្រុមហ៊ុន ប៉េង ហួត គ្រុប (Peng Hout Group) ដែលបានបង្កើតឡើងតាំងពីឆ្នាំ ២០០៥ ហើយក៏ជាក្រុមហ៊ុនកំពូលមួយ ក្នុងចំណោមក្រុមហ៊ុនកំពូលមួយចំនួនតូច ដែលមានជំនាញខ្ពស់ក្នុងការរចនា និង អភិវឌ្ឍន៍បុរីលំនៅដ្ឋាន, អគារខុនដូ, គម្រោងផ្សារទំនើប, អគារការិយាល័យ, អគារសន្និបាត ពិព័រណ៍ និង ពិធីរៀបអាពាហ៍ពិពាហ៍, សួនកម្សាន្តបែបអឺរ៉ុប និង សណ្ឋាគារផងដែរ។ ក្រុមហ៊ុន ប៉េង ហួត គ្រុប គ្រប់គ្រងគម្រោងបូរីជាង ៣០ ក្នុងតំបន់ដ៏មានសក្តានុពលនៃរាជធានីភ្នំពេញ។

 ២. អ្នកឧកញ៉ា លាង ម៉េង 

សព្វថ្ងៃ អ្នកឧកញ៉ា លាង ម៉េង មានតួនាទីជាអនុប្រធានសមាគមឧកញ៉ាកម្ពុជា។  អ្នកឧកញ៉ាកើតក្នុងឆ្នាំ ១៩៧៥ ហើយបានចូលប្រឡូកក្នុងវិស័យជំនួញតាំងពីឆ្នាំ ១៩៩៣។ អ្នកឧកញ៉ាជាសហស្ថាបនិក និង ជាប្រធានក្រុមហ៊ុន ជីប ម៉ុង គ្រុប ដែលជាសម្ព័ន្ធក្រុមហ៊ុនដ៏ធំមួយនៅក្នុងស្រុក ដែលមានបុត្រសម្ព័ន្ធក្នុងពហុវិស័យរួមមាន៖  ក្រុមហ៊ុនលក់សម្ភារ និង ទំនិញ (MFCG), ក្រុមហ៊ុនផលិត ចែកចាយស៊ីម៉ងត៍ និង បេតុងលាយស្រេច, ក្រុមហ៊ុនផលិតភេសជ្ជ ទឹកបរិសុទ្ធ និង ស្រាបៀរ, សណ្ឋាគារ, តំបន់កម្សាន្ត, ទីលានវាយកូនហ្គោល, ធនាគារ, ផ្សារទំនើប, វិស័យលក់រាយ, វិស័យសំណង់ និង អចលនទ្រព្យ រួមទាំង រោងចក្រឧស្សាហកម្មផងដែរ។

៣. អ្នកឧកញ៉ា សៀ ឬទ្ធី

អ្នកឧកញ៉ា សៀ ឬទ្ធី មានតួនាទីជាអនុប្រធានសមាគមឧកញ៉ាកម្ពុជា។ អ្នកឧកញ៉ាកើតក្នុងឆ្នាំ ១៩៧០ នៅក្រុងភ្នំពេញ។ អ្នកឧកញ៉ាបានចូលប្រឡូកក្នុងវិស័យជំនួញតាំងពីឆ្នាំ ១៩៩២ មកម្ល៉េះ។ បច្ចុប្បន្ន អ្នកឧកញ៉ា គឺជាម្ចាស់ និង ជាប្រធានក្រុមហ៊ុន WorldBridge Group ដែលមានក្រុមហ៊ុនជាបុត្រសម្ព័ន្ធប្រមាណ ៣០ ជាមួយនឹងទស្សនវិស័យ «ក្លាយទៅជាក្រុមហ៊ុនលេខ១ ក្នុងការផ្តល់នូវដំណោះស្រាយចម្រុះ តាមរយៈការដាក់ចេញនូវគម្រោងថ្មីៗដំបូងគេបំផុតក្នុងប្រទេសកម្ពុជា ដែលឆ្លុះបញ្ចាំងពីក្រុមហ៊ុនផង និង ប្រទេសកម្ពុជាផង»៕