មិនខ្លាចចូលគេមិនចុះ! នាយស្ពៃ សច្ចាច្បាស់ៗ សុខចិត្តអត់សូវមានញាតិរាប់ ក៏មិនឱ្យប្រពន្ធរងទឹកភ្នែក

មិនថានៅក្នុងវិស័យសិល្បៈ ឬការប្រើប្រាស់ជីវិតប្រចាំថ្ងៃរបស់មនុស្សសាមញ្ញធម្មតានោះទេ បច្ចុប្បន្នគេសង្កេតឃើញពេលបុរសជាប្ដីចេញក្រៅដើម្បីជួបជុំមិត្តភក្ដិបន់ភឿនសប្បាយក្អាកក្អាយនៅខាងក្រៅ ញឹកញាប់រហូតពេលខ្លះការសប្បាយនោះទៅជាហួសព្រំដែន បង្កទៅជារឿងអ្វីមួយផ្សេង ធ្វើឱ្យប្រពន្ធកូននៅផ្ទះមិនសប្បាយចិត្តក្លាយជារឿងរកាំរកូសក្នុងគ្រួសារ។

ទាក់ទងនឹងការលើកឡើងទាំងអស់នោះ ធ្វើឱ្យមានការចាប់អារម្មណ៍ជាខ្លាំងទៅលើពាក្យសម្ដីរបស់តារាកំប្លែង នាយស្ពៃ ដែលបានបង្ហោះសារក្នុងនាមជាប្ដី និង ឪពុកម្នាក់ប្រកបដោយការទំនួលខុសត្រូវ ដោយលោកបានតាំងចិត្តសច្ចាថា មិនឱ្យប្រពន្ធរងទឹកភ្នែកដោយសារប្ដីដើរផឹកស៊ីខាងក្រៅដាច់ខាត។

នាយស្ពៃ បានរៀបរាប់ប្រកាសស្ដែងៗនៅលើគណនីហ្វេសប៊ុកថា ៖ «រវាងការដើរលេងស៊ីផឹក និង រស់នៅជុំប្រពន្ធកូន ខ្ញុំសុំរើសយកជួបជុំប្រពន្ធកូនខ្ញុំហើយ ខ្ញុំចង់ឃើញប្រពន្ធកូនខ្ញុំមានស្នាមញញឹម និង មានភាពរីករាយ ខ្ញុំសច្ចានឹងខ្លួនឯងជាយូរហើយ ពេលខ្ញុំក្លាយជាមេគ្រួសារពេលណា ខ្ញុំមិនឱ្យប្រពន្ធកូនរងទឹកភ្នែកដោយសារខ្ញុំឡើយ I love my Family»។

ដ្បិតថា នាយស្ពៃ នៅក្មេង តែការទទួលខុសត្រូវចំពោះគ្រួសារ ការយកចិត្តទុកដាក់គិតដល់អារម្មណ៍ស្រ្តីជាប្រពន្ធបែបនេះ ធ្វើឱ្យមហាជនជាច្រើនសរសើរនូវទង្វើរបស់លោក៕