ប៉ាម៉ាក់មានកូនអាយុ ១៥ ឆ្នាំឡើង អាចនាំទៅធ្វើអត្តសញ្ញាណប័ណ្ណបាន គ្រាន់តែភ្ជាប់ឯកសារ ២ មុខនេះ

គេសង្កេតឃើញបច្ចុប្បន្ននេះ ការផ្ដល់ជូនសេវាសាធារណៈពីមន្រ្តីរាជការ មិនថាថ្នាក់លើរហូតដល់ថ្នាក់ក្រោមជាតិ កាន់តែផ្ដល់ភាពងាយស្រួល រហ័ស និង ប្រកបដោយវិជ្ជាជីវៈជូនប្រជាពលរដ្ឋ ជាពិសេសគឺការផ្ដល់សេវាសាធារៈនៅតាមឃុំ សង្កាត់ ឬច្រកចេញចូលតែមួយ ក៏កាន់តែដិតដល់ទូលំទូលាយជាងមុនច្រើន។

ជាក់ស្ដែង ការងារផ្ដល់សេវាអត្តសញ្ញាណកម្ម ដែលជាតម្រូវការចាំបាច់របស់ប្រជាពលរដ្ឋគ្រប់ក្រុមគ្រួសារ ក៏មានការរហ័សងាយស្រួលជាងមុនដែរ។ លើសពីនេះ បើតាមការលើកឡើងរបស់ឧត្តមសេនីយ៍ឯក សាយ ម៉េងឈាង បានឱ្យដឹងថា ការធ្វើអត្តសញ្ញាណប័ណ្ណសញ្ញាតិខ្មែរ គឺមិនចាំបាច់ទាល់តែគ្រប់អាយុ ១៨ ឆ្នាំទើបធ្វើបានទេ ប្រជាពលរដ្ឋខ្មែរដែលមានអាយុ ១៥ ឆ្នាំឡើងទៅ គឺអាចទៅថតរូបធ្វើអត្តសញ្ញាណប័ណ្ណសញ្ញាតិខ្មែរបានហើយ។

តាមប្រសាសន៍របស់ឧត្តមសេនីយ៍ឯក សាយ ម៉េងឈាង បានឱ្យដឹងថា លោកប៉ាអ្នកម៉ាក់ ឬ អាណាព្យាបាលដែលមានកូនអាយុ ១៥ ឆ្នាំឡើងទៅ អាចឱ្យសាមីខ្លួនមកថតរូបធ្វើអត្តសញ្ញាណប័ណ្ណសញ្ញាតិខ្មែរបាន ដោយគ្រាន់តែមានឯកសារ ២ មុខដូចជា ៖

១- សេចក្តីចម្លងសំបុត្រកំណើត និង
២- សៀវភៅស្នាក់ ឬសៀវភៅគ្រួសារ (ច្បាប់ដើម ឬ ចម្លងមានបញ្ជាក់)។

សម្រាប់ទីតាំង ប្រជាពលរដ្ឋអាចទៅស្នើសុំធ្វើអត្តសញ្ញាណប័ណ្ណសញ្ញាតិខ្មែរបាន នៅស្នងការដ្ឋាននគរបាលរាជធានីភ្នំពេញ ឬ អធិការដ្ឋាននគរបាលខណ្ឌ ឬប៉ុស្តិ៍នគរបាលរដ្ឋបាលសង្កាត់។ ព័ត៌មានបន្ថែម ឬមានចម្ងល់ផ្សេងៗ សូមទាក់ទងទៅកាន់លេខ ១២៧១ ដើម្បីជួបមន្ត្រីជំនាញ៕