រ៉េននី ដារ៉ា (Rainniedara) មានឈ្មោះពិតពេញថា តារា មុនីរ័ត្ន លោកត្រូវបានគេស្គាល់ថាជា Influencer លើមាតិកា Lifestyle ឬ បែបបទនៃការរស់នៅ ដែលជាញឹកញយលោកតែងបង្ហោះវីដេអូបង្ហាញពីការកាច់ស្ទីលថតរូប ហ្វេហ្សិន បច្ចេកទេសថតរូបតាមទូរស័ព្ទ ណែនាំពីកន្លែងថតរូបស្អាតៗ អាហារឆ្ងាញ់ៗ រួមទាំងចែករំលែកបទពិសោធថ្មីៗទាក់ទងនឹងជីវិតរស់នៅ ក៏ដូចជាសកម្មភាពនៅក្នុងសង្គម។
អាចនិយាយបានថា រ៉េននី ដារ៉ា ជា Influencer លេចធ្លោមួយរូបចំណោម Influencer ជួរមុខនៅកម្ពុជា។ នេះក៏ព្រោះភាពដោយឡែកជាមួយស្ទាយ៌ផ្ទាល់ខ្លួន ដែលធ្វើឱ្យលោកត្រូវបានគេស្គាល់ច្បាស់ក្នុងរយៈពេលដ៏ខ្លី ហើយក៏មានទីផ្សារស្ពនស័រគួរឱ្យកត់សម្គាល់ពីម៉ាកយីហោជាតិ និង អន្តរជាតិ។
ដើមចមមុនក្លាយជា Influencer ល្បីល្បាញមួយរូប ដើមឡើយ រ៉េននី ដារ៉ា គ្រាន់តែជាអ្នកលក់សម្លៀកបំពាក់ ដែលមានហាងផ្ទាល់ខ្លួនមួយនៅរាជធានីភ្នំពេញ។ នៅក្នុងឆ្នាំ ២០១៧ លោកបានចូលប្រកួតក្នុងកម្មវិធី Cambodian Net Idol រដូវកាលទី១ ជាកម្មវិធីស្វែងរកបុគ្គលមានឥទ្ធិពលជាងគេនៅលើបណ្តាញសង្គម ដែលរៀបចំឡើងដោយក្រុមហ៊ុនទូរស័ព្ទ Cellcard។ ប្រកួតជាប់ជ័យលាភីលេខ ៣ លោកបានចាប់ផ្តើមការងារជា Influencer ក្រោមការគ្រប់គ្រងរបស់ភ្នាក់ងារ Cake Experiential Communications ដោយធ្វើការរយៈពេលប្រមាណពីរឆ្នាំ ទើបងាកមកធ្វើជា Influencer ឯករាជ្យវិញ។
មកដល់បច្ចុប្បន្ន លោកទទួលបានការងារជាច្រើន រាប់តាំងពីក្នុងវិស័យសម្តែង ដើរម៉ូដ ថតម៉ូដ ថតពាណិជ្ជកម្ម និង review ដែលអាចរកចំណូលបានក្រាស់ក្រែល និង ក្លាយជា Influencer លេចធ្លោជួរមុខនៅកម្ពុជា៕
