ឆ្ងាយពីវិស័យរ៉េបយូរ MC Lisha វិលមកជាថ្មី សមត្ថភាពនៅតែខ្លាំងមិនចាញ់អ្នកជំនាន់ក្រោយ

ជាការពិតណាស់ បច្ចុប្បន្នវិស័យ Hip Hop កំពុងតែមានសន្ទុះគាំទ្រខ្លាំងក្នុងប្រទេសកម្ពុជា។ ក្នុងនោះក៏មានតារាចម្រៀងរ៉េប R&B កម្ពុជាជាច្រើនបានដុះពន្លកទទួលបានកេរ្តិ៍ឈ្មោះល្បីល្បាញ រហូតខ្លះល្បីរន្ទឺដល់ក្រៅប្រទេសទៀតផង។

ងាកនិយាយពីវិស័យ Hip Hop កាលពីប្រមាណជាង ២០ ឆ្នាំមុនវិញ ច្បាស់ណាស់មហាជននឹងនឹកដល់ក្រុម Hip Hop ដំបូងគេបង្អស់គឺ «Phnom Penh Bad Boyz» និង ផលិតកម្ម Klapyahandz ដែលជាផលិតកម្មចម្រៀងរ៉េបមុនដំបូងក្នុងប្រទេសកម្ពុជា។ ក្នុងនោះរួមមានតារាចម្រៀងរ៉េប និង ក្រុមចម្រៀងរ៉េបផ្សេងៗជាច្រើនទៀត ដូចជា DJ Sdey, Aping, DJ Cake, Pou Khlaing, ក្រុម Khmer Rap Boyz, Adda, Dj Kdep, Boomer the Sharpshooter, KayKay និង The Tiny Toones, Lisha, Mc Tola, Yungsters, Kate, Kelly, Casinova (US), JL Jupiter (US), Tony Re-al (US), Yavady ព្រមទាំង Maskinen ។-ល-។

យ៉ាងណាមិញ ចំពោះតារាចម្រៀងរ៉េបផ្នែកនារីក៏មានតិច ប៉ុន្តែគេក៏នៅចាំច្បាស់នៅឡើយពីវត្តមាន MC Lisha ដែលជា Rapper នារីមួយរូបល្បីឈ្មោះកាលពីអំឡុងឆ្នាំ ២០០៧ ដោយអ្នកនាងគឺជាតារាចម្រៀងរ៉េបជ្រកក្រោមផលិតកម្ម Klapyahandz។

អ្វីដែលគួរឱ្យចាប់អារម្មណ៍ មុននឹងប្រឡូកក្លាយជាតារាចម្រៀងរ៉េប និង អ្នកផលិតតន្ត្រីផ្នែក Hip Hop នោះ MC Lisha ក៏ជា DJ វិទ្យុ រួមនឹងរៀមច្បងដែលពាំនាំតន្ត្រីរ៉េបមកចាក់ក្នុងវិទ្យុស្រុកខ្មែរមុនគេដែរ គឺ DJ Sope តាំងពីឆ្នាំ ២០០២ មកម្ល៉េះ។

ជាការពិត ក្រោយកសាងកេរ្តិ៍ឈ្មោះក្នុងនាមជាតារាចម្រៀងរ៉េបផ្នែកនារីរបស់កម្ពុជា ដោយពាំនាំតន្ត្រី Hip Hop ឱ្យគេស្គាល់ទាំងក្នុងស្រុក និង ក្រៅស្រុកល្បីល្បាញជាច្រើនឆ្នាំហើយនោះ MC Lisha ម្ចាស់បទ «They Forgot About Us» រូបនេះ ក៏បានបាត់មុខមួយរយៈធំ ដោយអ្នកនាងទើបតែបង្ហាញវត្តមានជាថ្មីនៅចុងឆ្នាំ ២០២៤​ កន្លងមកវិញ។

រហូតដល់ដើមឆ្នាំ ២០២៥ MC Lisha ក៏ចាប់ផ្តើមមានទីផ្សារការងារផ្នែកវិស័យ Hip Hop ជាថ្មី មិនចាញ់សិស្សប្អូនជំនាន់ក្រោយនោះឡើយ បើទោះជារៀមច្បងរូបនេះបានបាត់មុខមួយរយៈហើយក្តីនោះ៕