និយាយពីការងារសិល្បៈរវាងកំពូលតារាចម្រៀងប្រុសឧកញ៉ា ខេមរៈ សិរីមន្ត និង តារាសម្ដែងស្រី នី មុន្នីនាថ មហាជនដែលនិយមចូលចិត្តទស្សនា MV បទចម្រៀងជាង ១០ ឆ្នាំមុនរបស់ឧកញ៉ា ច្បាស់បានជ្រាបហើយថាអ្នកទាំងពីរធ្លាប់ជាដៃគូដ៏ស័ក្តិសមសម្ដែងក្នុង MV ជាច្រើនកាលជំនាន់នោះ។
ពិតណាស់ កាលនោះ MV បទចម្រៀងភាគច្រើនរបស់ឧកញ៉ា ខេមរៈ សិរីមន្ត ទាំងបទបែបមនោសញ្ចេតនាកម្សត់ និង បទបែបប្រពៃណីខ្មែរផ្សេងៗ ភាគច្រើនមានវត្តមានរបស់កញ្ញា នី មុន្នីនាថ ជាតួស្រី ដែលសម្ដែងបានល្អសមខ្លាំងក្នុង MV ទាំងនោះ មានដូចជាបទ «ចង់បានប្រពន្ធខ្មែរ», បទ «ទៅយកប្ដីបារាំង» និង MV ចម្រៀងផ្សេងទៀត។
យ៉ាងណាមិញ រយៈពេលជាច្រើនឆ្នាំកន្លងទៅនេះ ឧកញ៉ា ខេមរៈ សិរីមន្ត និង តារាសម្ដែងស្រី នី មុន្នីនាថ ក៏មិនសូវឃើញបង្ហាញវត្តមានរួមការងារសម្ដែងក្នុង MV ចម្រៀងជាមួយគ្នាដូចពីមុនឡើយ ខណៈកំពូលតារាចម្រៀងប្រុសរូបនេះ បញ្ចេញស្នាដៃថ្មីភាគច្រើនជាចម្រៀងបែបសម័យថ្មីពេញនិយមសម្រាប់យុវវ័យ។
ដោយឡែក ថ្មីៗកន្លងទៅ ស្របពេលឧកញ៉ា ខេមរៈ សិរីមន្ត ចាប់ផ្ដើមបញ្ចេញស្នាដៃថ្មីជាបទចម្រៀងស្ទីលស៊េរីចាស់វិញ ក៏បានឃើញវត្តមានរបស់តារាស្រី នី មុន្នីនាថ ដៃគូចាស់ថតក្នុង MV បទចម្រៀងរបស់លោកជាថ្មី គឺបទ «តាលុងខេមរៈខ្មែរ West Side» ដែលជាបទប្រពៃណីខ្មែរត្រៀមសម្រាប់អបអរពិធីបុណ្យចូលឆ្នាំប្រពៃណីខ្មែរនេះ៕
សូមចុចទីនេះដើម្បីទស្សនាវីដេអូ៖
