បើលើកយកពីគ្រួសារអ្នកសិល្បៈដែលមានឈ្មោះបោះសំឡេង សាងកេរ្តិ៍ឈ្មោះតពីឪពុកម្តាយដល់កូនៗនោះ មហាជនជាច្រើនអាចនឹកគិតដល់ក្រុមគ្រួសារត្រកូល «ម៉ម» ដោយមានលោក ម៉ម សំនៀង, លោក ដួង វីរៈសិទ្ធ ដែលមានឈ្មោះដើម ម៉ម ដួងសិទ្ធ និង លោក ម៉ម ពេជ្ជរិទ្ធ ជាក់ជាមិនខាន។ ក្នុងនោះ គេដឹងថាអ្នកម្តាយរបស់បងប្អូនត្រកូល «ម៉ម» ទាំង ៣ ក៏ជាតារាចម្រៀងសម័យមួយរូប រីឯលោកឪពុកកាលលោកនៅមានជីវិត គឺជាតន្ត្រីករមួយរូបផងដែរ។
យ៉ាងណាមិញ ថ្ងៃនេះ «ប្រជាប្រិយ» នឹងលើកយកពីកូនប្រុសពៅក្នុងត្រកូល «ម៉ម» គឺលោក ម៉ម ពេជ្ជរិទ្ធ មកជម្រាបជូនអ្នកគាំទ្រ ដោយក្នុងនោះ ៥ ចំណុចសំខាន់ អាចនឹងមានអ្នកគាំទ្រមួយចំនួនតូចមិនទាន់បានដឹងនៅឡើយ។
១. ប្រឡូកសិល្បៈដំបូង
លោក ម៉ម ពេជ្ជរិទ្ធ ចូលប្រឡូកក្នុងវិស័យសិល្បៈដំបូង តាំងពីលោកមានអាយុ ១៥ ឆ្នាំ ពោលគឺអំឡុងឆ្នាំ ២០១៤ មកម្ល៉េះ។ បច្ចុប្បន្នតារាចម្រៀងប្រុសរូបនេះមានអាយុ ២៦ ឆ្នាំហើយ។
២. តារាចម្រៀងសហសម័យ
បើទោះជាមានឈ្មោះជាតារាចម្រៀងបែបយុវវ័យ និង និយមច្រៀងបទបែបមនោសញ្ចេតនាក៏ពិតមែន លោក ម៉ម ពេជ្ជរិទ្ធ ក៏ជាតារាចម្រៀងសហសម័យមួយរូប ដែលភាគច្រើនលោកនិយមច្រៀងចម្រៀងបទសម័យលាយកន្ទ្រឹមបែបប្រពៃណី។ ម្យ៉ាងវិញទៀត ក្នុងបទចម្រៀងនោះលោកក៏មានរួមបញ្ជូលចង្វាក់រ៉េបទៀតផង។
៣. ជំនាញឧបករណ៍តន្ត្រីបុរាណ និង សម័យ
លោក ម៉ម ពេជ្ជរិទ្ធ មិនត្រឹមតែអាចចេះប្រើប្រាស់ឧបករណ៍តន្ត្រីសម័យនោះទេ តែលោកអាចលេងឧបករណ៍តន្ត្រីបុរាណខ្មែរបានយ៉ាងច្រើនប្រភេទទៀតផង។
៤. តែងនិពន្ធទំនុកភ្លេង និង ទំនុកច្រៀង
មិនត្រឹមតែមានឈ្មោះជាតារាចម្រៀង លោក ម៉ម ពេជ្ជរិទ្ធ ក៏ជាអ្នកតែងនិពន្ធទំនុកភ្លេង និង ទំនុកច្រៀង ដែលលោកមិនត្រឹមតែតែងនិពន្ធសម្រាប់ខ្លួនឯងនោះទេ តែក៏មានបទចម្រៀងសិល្បករជាច្រើនលោកក៏បាននិពន្ធដែរ។
៥. រយាលការបញ្ចេញបទចម្រៀងផ្ទាល់ខ្លួន
អាចនឹងខុសពីសិល្បករដទៃក៏ថាបាន លោក ម៉ម ពេជ្ជរិទ្ធ ចាត់ទុកថាជាតារាចម្រៀងមួយរូបដែលរយាលក្នុងការបញ្ចេញនូវចម្រៀងថ្មីរបស់ខ្លួន។ ជាទូទៅ អ្នកគាំទ្រឃើញថាលោកបានបញ្ចេញបទចម្រៀងរាល់ពេលមានកម្មវិធីបុណ្យសំខាន់ៗប៉ុណ្ណោះ។
ជាក់ស្តែងកន្លងមក លោក ម៉ម ពេជ្ជរិទ្ធ បានឱ្យដឹងថា ទម្រាំផលិតបានបទចម្រៀងល្អមួយបទ លោកត្រូវចំណាយពេលចន្លោះ ៣ ខែ ទៅ ១ ឆ្នាំ ដោយលោកត្រូវធ្វើភ្លេងខ្លួនឯង តែងនិពន្ធទំនុកច្រៀង ហើយច្រៀងខ្លួនឯងទៀត៕
