បើនិយាយដល់តារាសម្តែង នី មុន្នីនាថ ប្រិយមិត្តច្បាស់ជាបានស្គាល់ហើយ ដោយនាងគឺជាតារាស្រីម្នាក់ដ៏មានប្រជាប្រិយភាពខ្ពស់ និង មានទេពកោលស្យដ៏លេចធ្លោម្នាក់នៅក្នុងឧស្សាហកម្មកម្សាន្តខ្មែរសម័យបច្ចុប្បន្ននេះ។
ដោយសារមានទេពកោសល្យសម្តែងល្អនោះ កញ្ញា នី មុន្នីនាថ ត្រូវបានអ្នកគាំទ្រដាក់រហស្សនាមមួយដល់នាងថែមទៀត គឺតារាទឹកភ្នែកជំនាន់ថ្មី ព្រោះនាងពូកែក្នុងនាមជាតារាកម្សត់ ហើយស្រក់ទឹកភ្នែកបានលឿន។
មិនត្រឹមតែពូកែសម្តែងក្នុងបែបបទសិល្បៈសម័យនោះទេ សូម្បីតែសិល្បៈក្នុងទម្រង់បុរាណ ក៏តារាស្រីរូបនេះមានគ្រឹះយ៉ាងរឹងមាំផងដែរ ព្រោះនាងគឺជានាដកាម្នាក់បានសិក្សាច្បាស់លាស់ចេញពីសាលាភូមិន្ទវិចិត្រសិល្បៈ។
យ៉ាងណាមិញ មួយរយៈក្រោយនេះ នី មុន្នីនាថ តែងឆក់បានការចាប់អារម្មណ៍ និង សរសើរខ្លាំងពីមហាជន បន្ទាប់ពីបានឃើញនាងបង្ហាញសកម្មភាពផ្សេងៗ ដើម្បីជួយផ្សព្វផ្សាយលើកស្ទួយវប្បធម៌ខ្មែរ ជាពិសេសតាមរយៈការតែងតួគ្រងឈុតប្រពៃណី និង ឈុតបុរាណផ្សេងៗថតលើទឹកដីអង្គរ។
ជាក់ស្តែង ថ្មីៗកន្លងទៅ តារាស្រីរូបនេះកាន់តែធ្វើឱ្យមហាជនចាប់អារម្មណ៍ ខណៈបានឃើញនាងគ្រងឈុតរបាំងបួងសួងថតមុខផ្ទាំងប្រាសាទខ្មែរ ទាំងស្រស់ស្អាត ទន់ភ្លន់ ដែលស្ដែងពីការជួយថែរក្សា និង លើកស្ទួយសម្បត្តិវប្បធម៌ខ្មែរគួរឱ្យសរសើរ៕
