ចំពោះតារាស្រីពហុជំនាញកញ្ញា ព្រះកាយ ច័ន្ទ បើរំឭកជុំវិញរឿងវិស័យបវរកញ្ញា កាលពីដើមឆ្នាំ ២០២៤ កន្លងទៅ តារាស្រីរូបនេះក៏បានធ្វើឱ្យមហាជនអ្នកគាំទ្រវិស័យបវរកញ្ញាផ្ទុះចាប់អារម្មណ៍គាំទ្រខ្លាំង ក្រោយពីនាងបានឈានជើងចូលវិស័យនេះ ប៉ុន្តែក៏ហាក់ធ្វើឱ្យអ្នកគាំទ្រខកចិត្ត និង ស្ដាយសមត្ថភាពមិនតិចដែរ ក្រោយបានបោះបង់ការប្រកួតវិញ។
យ៉ាងណាមិញ ក្រោយពីឆ្លងកាត់ការប្រកួតប្រជែងលើវិស័យនេះមួយរយៈ និង បានបោះបង់វិញ ជាង ១ ឆ្នាំមកនេះ ព្រះកាយ ច័ន្ទ ក៏បានវិលទៅកាន់អាជីពសិល្បៈវិញ ដោយពុំឃើញបង្ហើបទាក់ទងនឹងវិស័យបវរកញ្ញាទៀតឡើយ ប៉ុន្តែតារាស្រីរូបនេះ ក៏នៅតែទទួលបានការលើកទឹកចិត្តពីអ្នកគាំទ្រ ដោយមើលឃើញពីសមត្ថភាព និង រូបសម្រស់របស់នាងនៅតែស័ក្តិសមប្រឡូកក្នុងវិស័យបវរកញ្ញា។
ដោយឡែក ថ្មីៗនេះ ស្របពេលមហាជនអ្នកគាំទ្រវិស័យបវរកញ្ញាហាក់ជំរុញឱ្យនាងវិលត្រឡប់ចូលវិស័យបវរកញ្ញាជាថ្មី ក៏បានឃើញកញ្ញា ព្រះកាយ ច័ន្ទ និយាយក្នុងកិច្ចសម្ភាសមួយទាក់ទងនឹងវិស័យបវរកញ្ញានេះ ដែលទម្លាយនូវមូលហេតុច្បាស់ៗពីការបោះបង់ការប្រកួតលើកមុន និង មិនមានបំណងចង់ចូលប្រកួតជាថ្មីឡើយ ក៏ព្រោះតែនាងមានការងារសិល្បៈមមាញឹកច្រើន ទាំងការបង្ហាត់បង្រៀនកូនសិស្សក្នុងក្លឹប និង ការងារសិល្បៈរបស់ខ្លួន។
លើសពីនេះ អ្វីដែលធ្វើឱ្យ តារាស្រីរូបនេះដាច់ខាតមិនចង់ចូលម្ដងទៀត ព្រោះតែនាងធ្លាប់មានបទពិសោធមិនល្អក្នុងវិស័យម្ដងហើយ និង កត្ដាមួយទៀត គឺអ្នកម៉ាក់របស់នាង ដែលបានហាមឃាត់ដាច់អហង្ការមិនឱ្យនាងចូលទៀតទេ ព្រោះតែអ្នកម៉ាក់របស់នាងធ្លាប់តែឃើញកូនស្រីមានកេរ្តិ៍ឈ្មោះល្អ មិនដែលមានរឿងអាស្រូវឱ្យគេរិះគន់ ឬថាបង្អាប់ ប៉ុន្តែបែរត្រូវជួបរឿងរ៉ាវមិនល្អច្រើនក្នុងពេលប្រឡូកវិស័យនេះ៕
សូមចុចទីនេះដើម្បីទស្សនាវីដេអូ៖
