ប្រិយមិត្តដែលនិយមតាមដានវិស័យបវរកញ្ញានៅកម្ពុជា ភាគច្រើនសុទ្ធតែបានជ្រាបហើយថា កញ្ញា ប៉ូគីមថេង សុតធីតា គឺជាបវរកញ្ញាកម្ពុជាដ៏លេចធ្លោមួយរូប ដោយកញ្ញាគឺជាម្ចាស់ជ័យលាភីគ្រងមកុដ Miss Grand Cambodia 2021 ហើយកញ្ញាក៏មានឱកាសកាន់ទង់ជាតិកម្ពុជា ទៅប្រកួតលើឆាកអន្តរជាតិ MGI 2021 នៅប្រទេសថៃទៀតផង។
ចាប់តាំងពីគ្រងតំណែង Miss Grand Cambodia 2021 មក សុតធីតា មានរាសីឡើង ដោយនាងមិនត្រឹមតែមានទីផ្សារច្រើនផ្នែកបវរកញ្ញាទេ សូម្បីតែការងារជាពិធីការិនី ជាគណៈកម្មការកម្មវិធីបវរកញ្ញា និង ជាតារាសម្ដែង ក៏ស្រីស្អាតរូបនេះក្ដោបបានគួរឱ្យសរសើរ។
កន្លងមក ប៉ូគីមថេង សុតធីតា ហាក់ធ្វើឱ្យអ្នកគាំទ្រលើបណ្ដាញសង្គមមានការភ្ញាក់ផ្អើលបន្តិច ក្រោយនាងបង្ហោះសារនៅលើហ្វេសប៊ុកផេក ប្រកាសប្រាប់ពីក្ដីស្រមៃកាលពីក្មេងរបស់នាងចង់ក្លាយជា Miss Universe Cambodia តែនាងបែរជាមកប្រឡងកម្មវិធី Miss Grand Cambodia រហូតបានជ័យលាភីលេខ ១ ក្លាយជាម្ចាស់មកុដ។
ការបង្ហើបពីក្ដីស្រមៃកាលពីតូចរបស់ សុតធីតា បានធ្វើឱ្យអ្នកគាំទ្រនាងជាច្រើន នាំគ្នាជំរុញឱ្យស្រីស្រស់រូបនេះត្រឡប់មកប្រឡូកវិស័យបវរកញ្ញាម្ដងទៀត ហើយចូលប្រកួត Miss Universe Cambodia ដើម្បីសម្រេចតាមក្ដីស្រមៃកាលពីតូច៕
