ប្រិយមិត្តដែលនិយាយតាមដានជីវិតឯកជនរបស់អ្នកសិល្បៈ ប្រាកដជាបានស្គាល់ និង ជ្រាបរួចមកហើយថា អ្នកនាង ភិន សុដាលីស គឺជាកូនស្រីរបស់ អ៊ិន សុភិន ម្ចាស់ផលិតកម្មមហាហង្ស និង ជាស្ថានិកកម្មវិធីបវរកញ្ញាមួយចំនួន ដែលលោកត្រូវបានគេចាត់ទុកជាជើងខ្លាំងមួយរូបក្នុងវិស័យដឹកនាំភាពយន្ត ក៏ដូចជាវិស័យបវរកញ្ញា។
ដ្បិតថាអ្នកនាង ភិន សុដាលីស កើតក្នុងគ្រួសារមានទ្រព្យសម្បត្តិធូរធារ មានផ្ទះធំទ្រនំខ្ពស់ ប៉ុន្ដែតារាស្រីរូបនេះ ចេះរកលុយ ចំណាប់ខាងរកស៊ីដោយខ្លួនឯងតាំងពីនៅជាយុវវ័យមកម្ល៉េះ មិនផ្ដេកផ្ដួលរង់ចាំលាដៃសុំលុយឪពុកចាយឡើយ ដែលនាងបានបើកលក់ Contact Len និង របស់របរប្រើប្រាស់ជាច្រើនទៀត។
តាមរយៈវីដេអូមួយ អ្នកនាង ភិន សុដាលីស បានរៀបរាប់ឱ្យដឹងថា នាងចេះប្រឡូកក្នុងវិស័យលក់អនឡាញតាំងពីឆ្នាំ ២០០៩ មកឯណោះ ហើយក្រោយៗមក អ្នកនាងក៏កាន់តែពង្រឹងមុខរបរនេះឱ្យកាន់តែទូលំទូលាយរហូតបើកបានដល់ទៅ ២ សាខា ប៉ុន្ដែក្រោយមក អ្នកនាងក៏សម្រេចចិត្តបិតសាខាមួយចោល បន្ទាប់ពីជំងឺកូវីដ ១៩ រាតត្បាត។
នៅឆ្នាំ ២០២៤ ភិន សុដាលីស ក៏បាននាំកូនស្រីបណ្ដូលចិត្ត ចាកចេញពីប្រទេសកម្ពុជាទៅរស់នៅសហរដ្ឋអាមេរិក ដើម្បីឱ្យកូនស្រីបានរៀនសូត្រនៅទីនោះ ហើយមកដល់ឆ្នាំ ២០២៥ នេះ អ្នកម៉ាក់វ័យក្មេងរូបនេះ ក៏បានបន្តយកមុខរបរលក់ Contact Len ទៅលក់តាមអនឡាញដល់ទឹកដីសហរដ្ឋអាមេរិកទៀត ដោយបច្ចេកទេសក្នុងការផ្ញើអីវ៉ាន់ ការវិចខ្ចប់ និង ការដាក់លក់ផ្សេងៗ គឺនាងសិក្សាស្វែងយល់ដោយខ្លួនឯងទាំងអស់៕
