នាពេលថ្មីៗនេះ ក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុ បានចេញសេចក្តីឆ្លើយតបទៅនឹងមតិយោបល់របស់សាធារណជន ពាក់ព័ន្ធនឹងការបំពាក់ភ្លើងបំភ្លឺតាមដងផ្លូវល្បឿនលឿន។
តាមរយៈសេចក្ដីឆ្លើយតបនេះផងដែរ ក្រុមហ៊ុនផ្លូវល្បឿនលឿន បានបញ្ជាក់ឱ្យដឹងថា ការមិនដំឡើងអំពូលភ្លើងបំភ្លឺតាមដងផ្លូវ គឺជាការអនុវត្តតាមគោលការណ៍ និង មាត្រដ្ឋានដែលទទួលស្គាល់ពីអន្តរជាតិ ដោយភ្ជាប់ទៅនឹងមូលហេតុធំៗ ៣។
១. ផ្លូវល្បឿនលឿន ត្រូវបានបំពាក់នូវប្រព័ន្ធចំណាំងផ្លាតលើផ្លូវ ដែលអាចឆ្លុះបញ្ចាំងឃើញគំនូសផ្លូវ ទ្រូងផ្លូវ គំនូសបែងចែកគន្លងផ្លូវ និង របាំងកណ្តាលបានយ៉ាងច្បាស់លាស់។ នាពេលអ្នកបើកបរបើកភ្លើងបំភ្លឺផ្លូវខាងមុខនៅពេលយប់ ប្រព័ន្ធចំណាំងផ្លាតគន្លងផ្លូវទាំងសងខាងនឹងផ្លាតពន្លឺបានយ៉ាងច្បាស់នៅពេលប៉ះជាមួយភ្លើងរថយន្ត។
២. ផ្លូវល្បឿនលឿន គឺមិនអនុញ្ញាតិឱ្យអ្នកថ្មើរជើង ទោចក្រយាន ត្រីចក្រយាន យានអូសដោយសត្វ ម៉ូតូកង់បួនប្រើប្រាស់ផ្លូវនេះទេ។ ភ្លើងបំភ្លឺផ្លូវ ជាធម្មតាគឺរចនាឡើងដើម្បីសម្រួលដល់អ្នកថ្មើរជើង និង ទោចក្រ ឬ ត្រីចក្រយាន ក្នុងករណីគ្មានពន្លឺបញ្ចាំង ឬ ខ្សោយពន្លឺ។
៣. ដើម្បីកាត់បន្ថយការប្រើប្រាស់ថាមពល ព្រមទាំងគិតគូរអំពីបរិស្ថាន និង ផលប៉ះពាល់ផ្សេងៗជាយថាហេតុ ម៉្យាងវិញទៀតបង្គោលភ្លើងត្រូវមានចន្លោះកំណត់ពន្លឺ ដែលបំភ្លឺតាមផ្លូវ អាចមានការបំភ្លឺមិនស្មើគ្នា ខ្លះភ្លឺខ្លះងងឹត។ ក្នុងការបើកបរដោយល្បឿនលឿន ការប្រែប្រួលពន្លឺបែបនេះអាចធ្វើឱ្យភ្នែកអស់កម្លាំង ឆាប់ហត់ និង បង្កការងងុយក្នុងការបើកបរ ដែលអាចបណ្តាលឱ្យមានហានិភ័យលើសុវត្ថិភាពចរាចរណ៍។
បន្ថែមលើសពីនេះ ក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុ ក៏បានសូមអរគុណចំពោះការចូលរួមបញ្ចេញមតិ ក្នុងការស្ទង់មតិលើសេវាកម្មរបស់ផ្លូវល្បឿនលឿនភ្នំពេញ-ក្រុងព្រះសីហនុ ខណៈមតិយោបល់របស់លោកអ្នកពិតជាមានសារសំខាន់ ដើម្បីធ្វើការកែលម្អ បំពេញបន្ថែមនូវចំណុចខ្វះខាត ដើម្បីផ្តល់សេវាកម្មឱ្យកាន់តែប្រសើរឡើងមួយកម្រិតទៀតដល់អ្នកប្រើប្រាស់ផ្លូវល្បឿនលឿន៕
