មហាជននិយមចូលចិត្តទស្សនារឿងកំប្លែងខ្លីៗលើបណ្ដាញសង្គម ច្បាស់ជាបានស្គាល់ហើយពី នាយ ទីកូ ដែលជាតារាកំប្លែងស្ងួតដ៏មានប្រជាប្រិយភាពមួយរូប ឆក់បានការស្រឡាញ់ចូលចិត្តខ្លាំងតាមរយៈទេពកោសល្យនៃការលេងកំប្លុកកំប្លែងរបស់លោក ដើរតួជាមនុស្សចាស់ ជាតួកូនក្មេងញិរញក់ ជាពិសេសគឺតុបតែងខ្លួនសម្ដែងជាមនុស្សស្រីសមខ្លាំង។
ចំពោះស្នាដៃសម្ដែងកំប្លែងរបស់ នាយ ទីកូ កន្លងមកទទួលបានការសរសើរខ្លាំង ដែលរាល់វីដេអូនៃសាច់រឿងកំប្លែងរបស់លោក រួមជាមួយតារាកំប្លែងប្រុសស្រីល្បីៗផ្សេងទៀត តែងធ្វើឱ្យមហាជនបានទស្សនាហើយ ផ្ទុះសំណើចសើចសប្បាយ។
ជាមួយនឹងភាពល្បីល្បាញដោយសាទេពកោសល្យ និង សមត្ថភាពនៃការសម្ដែងកំប្លែងបានគ្រប់ទម្រង់នេះដែរ នាយ ទីកូ ពីមួយឆ្នាំទៅមួយឆ្នាំកាន់តែក្ដោបបានការងារសិល្បៈច្រើន រួមទាំងការងារច្រៀងភ្លេងការ និង កាត់សក់ក្នុងពិធីមង្គលទៀតផង ជាពិសេសមួយរយៈក្រោយ ទីកូ លេចមុខក្នុងកម្មវិធីល្បីៗជាច្រើនលើកញ្ចក់ទូរទស្សន៍ ព្រមទាំងថតវីដេអូផ្សាយឱ្យផលិតផលក្នុងស្រុកផងដែរ។
ដោយឡែក អ្វីកាន់តែចាប់អារម្មណ៍ទៀតនោះ ដោយធ្លាប់ឃើញតារាកំប្លែងរូបនេះ សម្ដែងកំប្លុកកំប្លែងធ្វើឱ្យគេសើចសប្បាយគ្រប់គ្នា ប៉ុន្តែថ្មីៗកន្លងទៅនេះ នីកូ បានចូលរួមធ្វើកិច្ចសម្ភាសក្នុងកម្មវិធី «អ្នកជិតខាង» ដែលបានទម្លាយរឿងរ៉ាវជីវិតឯកជនជាច្រើនមានទាំងកំសត់ ទាំងលំបាកខ្លាំង ទាក់ទងនឹងជីវិតគ្រួសាររបស់លោក និង បានឱ្យដឹងថារូបលោកមានប្រពន្ធ និង កូន ២ នាក់ហើយ។
ក្នុងនោះ អ្វីដែលធ្វើឱ្យមហាជនរំជួលចិត្តតាម ខណៈលោករៀបរាប់ទាំងទឹកភ្នែកពីជីវិតដ៏កំសត់ ធ្លាប់តស៊ូខ្លាំងមុនចូលសិល្បៈ មានជីវភាពក្រលំបាក ស៊ូដើរទូលនំអាកោរលក់ សុខចិត្តធ្វើគ្រប់បែបយ៉ាងដើម្បីតែចិញ្ចឹមប្រពន្ធកូនឱ្យបានរស់ស្រួល ធ្លាប់ក្រលំបាករហូតបាត់បង់កូនដំបូង ដែលព្រោះតែគ្មានលទ្ធភាពឱ្យពេទ្យជួយទាន់ពេល ទើបធ្វើឱ្យកូនដំបូងរបស់លោកស្លាប់ក្នុងពោះប្រពន្ធទៀតផង៕
សូមចុចទីនេះដើម្បីទស្សនាវីដេអូ៖
