ចែកគ្នាដឹង! ចង់កែតម្រូវសំបុត្រកំណើត អត្តសញ្ញាណប័ណ្ណ អាចធ្វើតាមវិធីនេះ មិនពិបាកដូចគេថាទៅសុំភ្លើងយក្សទេ

តាមដែលយើងធ្លាប់ឃើញកន្លងមក មានប្រជាពលរដ្ឋជាច្រើនតែងរអ៊ូរទាំពីការទៅប្រើប្រាស់សេវាសាធារណៈផ្សេងៗ ដូចជាការកែតម្រូវសំបុត្រកំណើត ការកែតម្រូវអត្តសញ្ញាប័ណ្ណ, អត្តសញ្ញាណប័ណ្ណផុតសុពលភាពចង់ធ្វើថ្មី ជាដើម ថាមានការលំបាក ឬ យឺតយូរមិនទាន់ចិត្តដូចការផ្សព្វផ្សាយនោះទេ។

មកដល់បច្ចុប្បន្ន ការផ្ដល់សេវាសាធារណៈរបស់មន្រ្តីរាជការជូនប្រជាពលរដ្ឋ កាន់តែមានភាពទូលំទូលាយ និង ងាយស្រួលច្រើន ទាំងទីកន្លែង និង សេវានានា ដោយការផ្ដល់សេវាសាធារណៈមួយចំនួន មិនត្រូវបានគិតប្រាក់ឡើយ។

យោងតាមប្រសាសន៍របស់ឧត្តមសេនីយ៍ឯក សាយ ម៉េងឈាង បានឱ្យដឹងថា ក្នុងករណីប្រជាពលរដ្ឋចង់កែតម្រូវសំបុត្រកំណើត ឬ កែតម្រូវអត្តសញ្ញាណប័ណ្ណ គឺមានជម្រើស ២ ៖

ទី១-ប្រជាពលរដ្ឋអាចដាក់ពាក្យស្នើសុំកែតម្រូវនៅសាលាក្រុង/ស្រុក/ខណ្ឌ ដែលប្រជាពលរដ្ឋបានចុះបញ្ជីអត្រានុកូលដ្ឋាន
ទី២-ប្រជាពលរដ្ឋរាជធានី-ខេត្ត អាចដាក់ពាក្យស្នើសុំកែតម្រូវនៅនាយកដ្ឋានអត្រានុកូលដ្ឋាន នៃអគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ

សម្រាប់ព័ត៌មានលម្អិត សូមទំនាក់ទំនងតាមរយៈលេខទូរស័ព្ទ 1271 ឬ 017 898 915 ដោយឥតគិតថ្លៃរៀងរាល់ម៉ោងធ្វើការ ដើម្បីជួបជំនាញពន្យល់អំពីនីតិវិធី និង ឯកសារត្រូវភ្ជាប់៕