ថ្មីៗនេះមានករណីស្រ្តីជនជាតិរុស្ស៊ីវ័យ ៤៥ ម្នាក់ ដែលបានភ្លាត់ជើងធ្លាក់ពីលើទីខ្ពស់កម្ពស់ ៨៨ ម៉ែត្រ ក្រោយពីបាននាំកូនប្រុសទៅលោតកីឡា ដើម្បីអបអរថ្ងៃកំណើតរបស់ខ្លួន។
តាមព័ត៌មានបានឱ្យដឹងថា ហេតុការណ៍ខាងលើបានកើតឡើងកាលពីថ្ងៃទី ៣០ ខែសីហា ឆ្នាំ ២០២៥ កន្លងទៅ ដោយស្រ្តីខាងលើនេះមានឈ្មោះថា Elizaveta Gushina អាយុ ៤៥ ឆ្នាំ។ នៅថ្ងៃកើតហេតុ នាងបាននាំកូនប្រុសទៅលេងកីឡា bungee នៅលើបំពង់ផ្សែងដែលគេបោះបង់របស់រោងចក្រថាមពលកំដៅនៅទីក្រុង Papavlovsk ដែលមានកម្ពស់រហូតទៅដល់ ៨៨ ម៉ែត្រ ដើម្បីអបអរថ្ងៃកំណើតរបស់នាង។
តាមព័ត៌មានបានឱ្យដឹងថា នាងបានចងខ្សែ និងពាក់ខ្សែក្រវ៉ាត់រក្សាសុវត្ថិភាព រួចលោតទៅម្តងរួចទៅហើយ ដោយមិនមានអ្វីកើតឡើងឡើយ ហើយនាងក៏បានឡើងទៅវិញម្តងទៀត ដោយមិនមានខ្សែសុវត្ថិភាព ដើម្បីថតរូបលេងជាមួយកូនប្រុស ស្រាប់តែរអិលជើងលើក្តារសើម រួចក៏ធ្លាក់មកខាងក្រោមស្លាប់តែម្តង។ ដោយឡែក អាជ្ញាធរក្នុងប្រទេសរុស្សីបានបើកការស៊ើបអង្កេតទៅលើសុវត្ថិភាព និងភាពស្របច្បាប់នៃកន្លែងដែលនាងបានលោត bungee នេះផងដែរ៕
