ស្រលាញ់គ្នា ៦ ឆ្នាំដឹកដៃគ្នារៀបការ កម្មវិធីមិនទាន់ចប់ផងកូនកំលោះដាក់មេប្រូចបាត់ ច្រើនខែក្រោយធ្លាយដំណឹងហួសចិត្ត

ថ្ងៃមង្គលក្លាយជាថ្ងៃអពមង្គលមួយរំពេច ក្រោយកូនកំលោះបានរត់ចោលកូនក្រមុំនៅថ្ងៃរៀបការ ខណៈដែលកម្មវិធីមិនទាន់ចប់ស្រួលបួល ធ្វើឱ្យកូនក្រមុំរងភាពអាម៉ាស់បំផុត។ នារីជាកូនក្រមុំជួបរឿងខកចិត្តនេះ មានឈ្មោះថា Kylie ជាជនជាតិអូស្ត្រាលី។ នាងត្រូវបានកម្មវិធីវិទ្យុមួយហៅថា «Late Drive with Ben, Liam & Belle» បានអញ្ជើញចូលរួមចែករំលែកនូវបទពិសោធដ៏អាក្រក់របស់នាង។

នាងបាននិយាយថា កម្មវិធីរៀបការរបស់នាងមានរយៈពេលខ្លីបំផុត វាមិនដល់ ២៤ ម៉ោងផង។ នៅថ្ងៃកម្មវិធី កូនកំលោះបានបង្ហាញខ្លួនធម្មតា ថតរូបពោរពេញដោយស្នាមញញឹម និង ក្តីស្រលាញ់។ យ៉ាងណាមិញ អារម្មណ៍រំភើបរីករាយកើតឡើងតែមួយភ្លែត ដោយខណៈកម្មវិធីមិនទាន់ចប់ស្រួលបួលផង កូនកំលោះក៏បានរត់គេចខ្លួនបាត់។

Kylie នាងបានរម្លឹកថា នាង និង ស្វាមី បានទាក់ទងគ្នាអស់រយៈពេល ៦ ឆ្នាំ ដោយមិនដែលមានបញ្ហាអ្វីនឹងគ្នាសោះឡើយ។ ច្រើនខែដែលស្វាមីរត់ចោល នាងមិនមានដំណឹងអ្វីពីគេនោះទេ។ នាងបានបង្ខំចិត្តលុបចោលគម្រោងក្រេបទឹកឃ្មុំ ហើយប្រឈមភាពអាម៉ាស់នៅពេលដែល ក្រុមគ្រួសារ រួមទាំងមិត្តភក្តិ សួរនាំអំពីការបាត់ខ្លួនរបស់ប្តីនាង។

អ្វីៗលើសពីការហួសចិត្ត មិនបានប៉ុន្មាន នាងក៏បានដឹងការពិតនៅពីក្រោយការបាត់ខ្លួន គឺប្តីរបស់នាងបានទាក់ទងជាមួយអ្នកផ្សេង។ អ្នកផ្សេងនោះមិននៅឆ្ងាយខ្លួនឡើយ គឺជាបងប្អូនជីដូនមួយរបស់នាងតែម្តង។

នាងបានប្រាប់កម្មវិធីវិទ្យុខាងលើថា ក្រោយដឹងដំណឹងនេះ នាងសម្រេចចិត្តថានឹងកាត់ចិត្ត ហើយរៀបចំអ្វីគ្រប់យ៉ាងដើម្បីលែងលះ។ វាជាបទពិសោធដ៏អាក្រក់មួយ  ដែលបន្សល់ជាស្លាកស្នាម ធ្វើឱ្យនាងចងចាំពេញមួយជីវិត។ ខាងកម្មវិធីវិទ្យុបានសួរនាងដែរថា បន្ទាប់ពីលែងលះ តើនាងនឹងរៀបការទៀតទេ?។ ចម្លើយមួយម៉ាត់យ៉ាងខ្លីគឺ «ទេ»៕

ប្រភព៖ NYP