នឹកគ្រាកាលនៅក្មេងៗ ខណៈសម័យមិនទាន់ទំនើប មិនទាន់មានទូរស័ព្ទឆ្លាតវៃប្រើប្រាស់ និង របស់របរលេងសម្បូរបែប ក្មេងៗកើតជំនាន់ឆ្នាំ ៨០-៩០ ឡើង តែងនាំគ្នាលេងតែល្បែងកម្សាន្តណាដែលមានស្រាប់ពីដូនតា ដូចជា លេងគប់វង់ លេងលោតមឹក លេងរត់ស៊ីខួង យកសម្បកខ្ចៅហើយខួងដីលេងបាយខុម លេងបាញ់ឃ្លី លេងត្រែះ លោតកៅស៊ូ លេងដីឥដ្ឋ ជាដើម។ ជាមួយគ្នានោះ សូម្បីតែរុក្ខជាតិមួយចំនួនក៏ត្រូវបានលើកយកមកលេងជាល្បែងកម្សាន្តយ៉ាងសប្បាយផងដែរ ដូចជា យកធាងចេកមកកាច់ធ្វើជាក្បាលសេះ ហើយជិះដេញគ្នាលេង អូសធាងដូង លេងឡើងផ្ទះ និង ផ្កាភ្ញីមួយចំនួនទៀត ក៏ត្រូវបានពួកគេនិយមយកមកលេងដើម្បីតុបតែងខ្លួនបង្អួតគ្នាដែរ។
និយាយអំពីផ្កា ដោយក្នុងចំណោមផ្កាដែលក្មេងៗជំនាន់ឆ្នាំ ៨០-៩០ ឡើង និយមយកមកលេងជាល្បែងកម្សាន្តនោះ គឺមានផ្កាមួយប្រភេទពេញនិយមខ្លាំងជាងគេ ព្រោះផ្កានោះមិនពិបាករក វាមានដុះនៅជាប់នឹងរបងផ្ទះ មានចង្កោមផ្កាច្រើន ហើយមានពណ៌ចម្រុះក្នុងស្មែងតែមួយយ៉ាងស្រស់ស្អាត។ ផ្កានោះ ពួកគេតែយកមកដោតភ្ជាប់ឆ្លាស់ពណ៌បន្តគ្នា ច្នៃជាគ្រឿងអលង្ការនានា មានខ្សែ-ក ខ្សែដៃ កងជើង ជាដើម ដើម្បីពាក់សម្ញែងគ្នា អួតគ្នាលេងយ៉ាងឡូយ និង គួរឱ្យចាប់អារម្មណ៍ណាស់។
ទោះជាផ្កានោះពេញនិយមលេងក៏ដោយ ប៉ុន្តែក្មេងៗជំនាន់នោះមិនសូវស្គាល់ឈ្មោះច្បាស់លាស់ដែរ ដោយខ្លះបានហៅតៗគ្នាថា ផ្កាក្រចកនាង ផ្កាដូងព្រះ ផ្កាខ្សែ-ក ផ្កាច្រវ៉ាក់ ឬ ហៅអ្វីផ្សេងទៅតាមការយល់ឃើញ និង តាមលក្ខណៈនៃផ្កា។ យ៉ាងណាមិញ ថ្មីៗនេះ នៅលើទំព័រហ្វេសប៊ុកផេក ជីវៈចម្រុះនៃប្រទេសកម្ពុជា បានបង្ហាញយ៉ាងច្បាស់ពីឈ្មោះផ្កាមួយប្រភេទនោះ និង ថែមទាំងបានតែងជាកំណាព្យរៀបរាប់ពីសម្រស់ផ្កាទៀតផង។
ពិតណាស់ បើតាមទំព័រផេក ជីវៈចម្រុះនៃប្រទេសកម្ពុជា បានបញ្ជាក់ពីផ្កាមួយប្រភេទនោះគឺមានឈ្មោះថា ផ្កាអណ្តូងប្រាំង។ បើមើលតាមលក្ខណៈ ផ្កាអណ្តូងប្រាំង មានសណ្ឋានដើមជាវល្លិ៍ដុំព័ទ្ធចាក់ស្រែះចូលគ្នា ស្លឹកពណ៌បៃតងប៉ុនពីរធ្នាប់ដៃ មិនខ្លីពេក មិនវែងពេក ហើយចេញផ្កាជាស្មែងៗមានលក្ខណៈដូចកាំជ្រួច និង មានពណ៌ចម្រុះគ្នាក្នុងស្នែងតែមួយ មើលទៅស្រស់ស្អាតណាស់៕
