ឆ្នាំនេះ ពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំម្សាញ់ សប្តស័ក ពុទ្ធសករាជ ២៥៦៩ នឹងរំកិលឈានចូលមកដល់នៅវេលាទៀបភ្លឺ ថ្ងៃចន្ទ ២ រោច ខែចេត្រ ត្រូវនឹងថ្ងៃទី ១៤ ខែមេសា គ្រឹស្តសករាជ ២០២៥ វេលាម៉ោង ៤ និង ៤៨ នាទីទៀបភ្លឺ។ ទេវធីតា ដែលនឹងយាងមកគ្រប់គ្រងជម្ពូរទ្វីបមនុស្សលោកឆ្នាំថ្មីនេះ មានព្រះនាម គោរាគទេវី ជារាជបុត្រីទី ២ នៃកបិលមហាព្រហ្ម គង់នៅចាតុម្មហារាជិកា ទ្រង់អម្ពរពណ៌លឿង លម្អនៅព្រះកាណ៌ដោយសៀតផ្កាអង្គារបុស្ប អភរណៈ កែវមុក្តា ភក្សាហារទ្រង់តេលំ (ប្រេង) ព្រះហស្តស្តាំទ្រង់ព្រះខ័ន្ធ ព្រះហស្តឆ្វេងទ្រង់ឈើច្រត់ ទ្រង់គង់ផ្ទំបិទព្រះនេត្រលើខ្នងសេ្តចព្យាគ្ឃៈ (ខ្លា) ជាយានពាហនៈ។
ក្នុងឆ្នាំថ្មីនេះដែរ ផ្កាដែលទេវធីតាឆ្នាំថ្មី ព្រះនាម គោរាគទេវី ទ្រង់សៀតផ្កា «អង្គារបុស្ប» នៅនឹងព្រះកាណ៌ (ត្រចៀក) ពេលយាងចុះមកគ្រប់គ្រងជម្ពូរទ្វីប។ ខាងក្រោមនេះជាសម្រស់ក្រុមបុប្ផជាតិ (ផ្កា) ទាំងប្រាំពីរ ដែលទេវធីតាសង្ក្រាន្តទ្រង់សៀតនឹងព្រះកាណ៌។
– បុត្រីទី ១ ព្រះនាម ទុង្សាទេវី ជិះសេ្តចគ្រុឌ (ថ្ងៃអាទិត្យ) សៀតផ្កាទទឹម
– បុត្រីទី ២ ព្រះនាម គោរាគទេវី ជិះសត្វខ្លា (ថ្ងៃចន្ទ័) សៀតផ្កាអង្គាបុស្ប
– បុត្រីទី ៣ ព្រះនាម រាក្យសាទេវី ជិះសត្វសេះ (ថ្ងៃអង្គារ) សៀតផ្កាបទុម (ឈូក)
– បុត្រីទី ៤ ព្រះនាម មណ្ឌាទេវី ជិះសត្វលា (ថ្ងៃពុធ) សៀតផ្កាចម្ប៉ា
– បុត្រីទី ៥ ព្រះនាម កិរិណីទេវី ជិះសត្វដំរី (ថ្ងៃព្រហស្បតិ៍) សៀតផ្កាមន្ទារ ឬ មន្ទារវបុស្ប ឬ មន្ទារបុស្ប (ពពួកផ្កាសណ្ឋានស្រដៀងយីហ៊ុប ប៉ុន្តែ វែងជាង)
– បុត្រីទី ៦ ព្រះនាម កិមិរាទេវី ជិះសត្វក្របី (ថ្ងៃសុក្រ) សៀតផ្កាចង្កុលណី (វារិជជាតិជំពូកព្រលិត លំចង់)
– បុត្រីទី ៧ ព្រះនាម មហោទរាទេវី ជិះសត្វក្ងោក (ថ្ងៃសៅរ៍) សៀតផ្កាត្រកៀត (វារិជជាតិជំពូកកំប្លោក)
