ជាការពិត នៅពេលដែលដំឡើងបន្ទាត់ពន្ធគយ ឬ អត្រាពន្ធទៅលើផលិតផលដែលនាំចេញទៅនោះ ដែលនៅពេលដំឡើងអត្រាពន្ធ មានន័យថា ផលិតផលនឹងឡើងថ្លៃ ហើយឡើងថ្លៃ គឺនៅប្រទេសដែលជាប្រទេសគោលដៅ ឬ ជាប្រទេសនាំចូល។ នេះជាការលើកឡើងរបស់រដ្ឋមន្ត្រីក្រសួងពាណិជ្ជកម្ម លោកជំទាវ ចម និម្មល ថ្លែងក្នុងបទសម្ភាសជាមួយទូរទស្សន៍ជាតិកម្ពុជា នៅយប់ថ្ងៃទី ៣ ខែមេសា ឆ្នាំ ២០២៥ កន្លងទៅ។
លោកជំទាវរដ្ឋមន្ត្រី បានបន្ថែមឱ្យដឹងថា ៖ «ដូច្នេះការដំឡើងនេះ គឺអ្នកបញ្ជាទិញដំបូង និង ប្រជាជននៅសហរដ្ឋអាមេរិក ដែលជាអ្នកប្រើប្រាស់ផលិតផលពីកម្ពុជា គឺជាអ្នកទទួលរងផលប៉ះពាល់ដំបូង ហើយផលប៉ះពាល់បន្ទាប់គឺ កម្ពុជា ជាពិសេសគឺអ្នកដែលធ្វើធុរកិច្ចក្នុងវិស័យដូចជាវិស័យវាយនភណ្ឌ ស្បែកជើង សម្ភារសម្រាប់ធ្វើដំណើរជាដើម»។
បន្ថែមលើសពីនេះ លោកជំទាវរដ្ឋមន្ត្រី បានពន្យល់បន្ថែមថា កិច្ចការដំឡើងអត្រាពន្ធនេះ គឺជាវិធានការរបស់សហរដ្ឋអាមេរិក ដើម្បីឱ្យមានតុល្យភាពនៃជញ្ជីញពាណិជ្ជកម្មរបស់ខ្លួនជាមួយដៃគូទាំងអស់នៅលើពិភពលោក មិនមែនធ្វើដាច់ដោយឡែកតែជាមួយកម្ពុជានោះទេ។
ក្នុងនោះផងដែរ លោកជំទាវ ក៏បានអំពាវនាវដល់ជនរួមជាតិសូមកុំមានការភ័យបារម្ភ ឬ មានមន្ទិលសង្ស័យពាក់ព័ន្ធនឹងដំណោះស្រាយចំពោះមុខ ខណៈរាជរដ្ឋាភិបាលក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត បានយកចិត្តទុកដាក់ខ្ពស់ពាក់ព័ន្ធនឹងការងារនេះ ហើយក្រសួង/ស្ថាប័នពាក់ព័ន្ធដែលជាសេនាធិការ បាន និង កំពុងធ្វើការងារនេះមួយចំនួនរួចមកហើយ ដើម្បីការពារនូវអត្ថប្រយោជន៍របស់ជាតិ ប្រជាពលរដ្ឋ ក៏ដូចជាបងប្អូនកម្មករកម្មការិនីរបស់យើង ជាពិសេសនៅក្នុងឧស្សាហកម្មដ៏លេចធ្លោរបស់កម្ពុជា៕
ប្រភព ៖ ក្រសួងព័ត៌មាន
