នៅថ្ងៃទី ១៨ ខែកក្កដា ឆ្នាំ ២០២៥ នេះ ក្រុមបាតុករទាំង ៣ ក្រុមធំៗនៅក្នុងប្រទេសថៃ បានចោទប្រកាន់ថាកម្ពុជាអ្នកដាក់គ្រាប់មីននៅតំបន់មុំបី បណ្តាលឱ្យគ្រោះថ្នាក់ដល់ទាហានថៃអស់ ៣ នាក់ ហើយបានដាក់លិខិតស្នើទាមទារឱ្យក្រសួងការបរទេសរបស់ខ្លួន ហៅអគ្គរាជទូតខ្មែរនៅថៃទៅជួបថ្កោលទោស ព្រមទាំងដាក់ពាក្យបណ្តឹងទៅកាន់អង្គការសហប្រជាជាតិ។
ក្រុមខាងលើនេះ មានដូចជាក្រុមគណៈកម្មាធិការប្រជាជនដើម្បីការផ្លាស់ប្តូរប្រទេសថៃ ក្រុមកងទ័ពធម៌អាថ៌ ព្រមទាំងមជ្ឈមណ្ឌលប្រជាជនសម្រាប់ការការពារស្ថាប័ន បានប្រកាសថាករណីនេះ គឺជាការរំលោភលើអធិបតេយ្យភាពរបស់ថៃ ហើយចោទថាកម្ពុជាបានបំពានលើអនុសញ្ញាអូតាវ៉ា ដែលទាំងប្រទេសថៃ និង កម្ពុជា ត្រូវបានហាមឃាត់ការប្រើប្រាស់ ស្តុកទុក ផលិតមីនគ្រប់ប្រភេទ ព្រមទាំងបំពានអនុស្សរណៈនៃការយោគយល់គ្នា MoU ឆ្នាំ ២០០០ រវាងប្រទេសទាំងពីរ។
យ៉ាងណាមិញ ក្រុមខាងលើបាននាំគ្នាដាក់លិខិតទៅកាន់ក្រសួងការបរទេស ឱ្យហៅអង្គរាជទូតកម្ពុជានៅក្នុងប្រទេសថៃឱ្យមកជួប និង ថ្កោលទោសជាផ្លូវការ និង ចាត់វិធានការតាមផ្លូវច្បាប់ចំពោះអ្នកពាក់ព័ន្ធក្នុងការលួចដាក់គ្រាប់មីននេះ ជាពិសេសគឺឱ្យផ្ញើលិខិតប្តឹងទៅអង្គការសហប្រជាជាតិ (UN) ទាក់ទងនឹងករណីនេះ៕
ប្រភព៖ AMARINTV
