ក្រៅពីមានជំនួញដ៏មហាសាល អ្នកឧកញ៉ា គិត ម៉េង ក៏មានជីវិតគ្រួសារយ៉ាងមានសុភមង្គលផងដែរ។ ជាក់ស្តែង តាមរយៈសកម្មភាព និង រូបភាព អ្នកឧកញ៉ា និង ក្រុមគ្រួសារ រមែងឆ្លៀតចំណាយពេលវេលា និង ធ្វើទង្វើចំពោះគ្នា ដែលស្តែងឱ្យឃើញយ៉ាងច្បាស់ពីការផ្តល់ក្តីស្រលាញ់ពិតប្រាកដ។
ជាមួយគន្លឹះសុភមង្គល ថ្មីៗនេះ អ្នកឧកញ៉ា គិត ម៉េង បានចែករំលែកនៅលើបណ្តាញសង្គម ដោយលើកឡើងអំពីក្តីស្រលាញ់ពិត ដែលលើសពីពាក្យនិយាយថាស្រលាញ់។ លោកបានចែករំលែកលម្អិតថា៖
សិល្បៈនៃការនិយាយថា «ខ្ញុំស្រលាញ់អ្នក»
ក្តីស្រលាញ់ត្រូវបង្ហាញតាមរយៈទង្វើ មិនមែនគ្រាន់តែនិយាយថាស្រលាញ់នោះទេ។ ក្តីស្រលាញ់ស្តែងចេញតាមរយៈពេលវេលាស្ងប់ស្ងាត់ និង សកម្មភាពសាមញ្ញៗប្រចាំថ្ងៃ ដែលយើងតែងមើលរំលង។ ខ្ញុំសូមចែករំលែកវិធីសាមញ្ញៗដ៏មានន័យបំផុត ដែលបង្ហាញពីក្តីស្រលាញ់ និង ការឱ្យតម្លៃចំពោះនរណាម្នាក់ក្នុងជីវិតប្រចាំថ្ងៃ (អ្នកប្រហែលមិនបានកត់សម្គាល់ពីវិធីមួយចំនួនក្នុងចំណោមវិធីទាំងអស់នោះទេ)។
– ធ្វើទង្វើគួរឱ្យភ្ញាក់ផ្អើល ដែលបង្ហាញថា «ខ្ញុំតែងគិតដល់អ្នក» ៖ យកមកផ្ទះនូវរបស់ ឬអាហារ ដែលគាត់ចូលចិត្តមកឱ្យគាត់ ឬផ្ញើរូបភាព ឬរឿងកំប្លែង ដែលធ្វើឱ្យអ្នកនឹកឃើញដល់ពេលដែលអ្នក និង គាត់បានរីករាយជាមួយគ្នា។
– ប្រកាន់ខ្ជាប់នូវទម្លាប់ ដែលអ្នកធ្វើរាល់ព្រឹក ៖ សម្ងួតកន្សែងទុកសម្រាប់ឱ្យពួកគាត់ងូតទឹក ឬរៀបចំអាហារពេលព្រឹកសម្រាប់ពួកគាត់ មុនពេលពួកគាត់ក្រោកពីដំណេក។
– ជួយដោយពុំចាំបាច់មានការសុំ ៖ ចាក់សាំងរថយន្តឬម៉ូតូឱ្យពេញ សាកថ្មទូរសព្ទឱ្យពួកគាត់ ឬរៀបចំកន្លែងធ្វើការឱ្យពួកគាត់។
– ពោលសរសើរដោយស្ងាត់ៗ ៖ ខ្សឹបប្រាប់ថា “ខ្ញុំពិតជាមានភ័ព្វណាស់ដែលមានអ្នក” ខណៈពេលដែលពួកគាត់កំពុងធ្វើកិច្ចការសាមញ្ញធម្មតាៗ ដូចជាកំពុងលាងចាន។
– ធ្វើជាអ្នករក្សាទុកនូវអនុស្សាវរីយ៍តូចៗដ៏មានតម្លៃ ៖ និយាយអំពីអនុស្សាវរីយ៍តូច ឬផ្ទាល់ខ្លួនមួយ ដែលអ្នកទាំងពីរបានជួប ប៉ុន្តែមិនបាននឹកឃើញរយៈពេលយូរមកហើយ។ ឧទាហរណ៍ អ្នកអាចនិយាយថា៖ «បទចម្រៀងនេះធ្វើឱ្យខ្ញុំនឹកឃើញថ្ងៃ ដែលអ្នករៀនក្រោកឈរកាលអ្នកនៅជាកូនង៉ែត»។
– ធ្វើជាអ្នកផ្តល់ផាសុកភាព ៖ សង្កេតមើលនៅពេលពួកគាត់ហត់នឿយ សូមម៉ាស្សាបាតជើងជូនពួកគាត់ ឬផ្តល់អ្វីដែលមានភាពកក់ក្តៅដល់ពួកគាត់ ឬគ្រាន់តែនៅជាមួយពួកគាត់ក្នុងពេលនោះ។
– ធ្វើជាអ្នកលើកទឹកចិត្ត ជាអ្នកគាំទ្រប្រកបដោយមោទកភាព ៖ អបអរសាទរជោគជ័យតូចៗ ដោយនិយាយទៅកាន់ពួកគាត់ថា៖ «អ្នកធ្វើវាបានល្អណាស់។ ខ្ញុំមានមោទកភាពចំពោះអ្នក»។
ក្តីស្រលាញ់ពិតត្រូវបង្ហាញឱ្យបានទៀងទាត់តាមរយៈទង្វើ កាយវិការ វត្តមាន និងការយកចិត្តទុកដាក់ចំពោះគ្នាទៅវិញទៅមក មិនមែនបង្ហាញតែក្នុងឱកាសពិសេស ឬព្រឹត្តិការណ៍ធំណាមួយនោះទេ។ វិធីទាំងអស់នេះ គឺជាសិល្បៈនៃការនិយាយថា “ខ្ញុំស្រទ្បាញ់អ្នក”៕
