ពិតណាស់ ចំពោះដំណើរមកកាន់ទឹកដីកម្ពុជារបស់តារាសម្ដែងបូលីវូដដ៏ល្បីល្បាញលោក GAGAN Malik ដែលមហាជនខ្មែរភាគច្រើនស្គាល់តាមរយៈការសម្ដែងជាតួអង្គព្រះពុទ្ធ និង ព្រះរាមនោះ បានធ្វើឱ្យអ្នកគាំទ្រកម្ពុជាផ្ទុះការចាប់អារម្មណ៍ និង រំភើបចិត្តខ្លាំង ក្រោយឃើញលោកបង្ហាញខ្លួនយ៉ាងស្រស់សង្ហាលើទឹកដីអង្គរខេត្តសៀមរាប។
បើតាមរយៈការបង្ហោះលើហ្វេសប៊ុកផេកក្រសួងទេសចរណ៍ បានឱ្យដឹងថា តារាសម្ដែងបូលីវូដដ៏ល្បីរូបនេះ មកកាន់ប្រទេសកម្ពុជា និង ដើរធ្វើទស្សនកិច្ចនៅតំបន់អង្គរទឹកដីខេត្តសៀមរាប ដែលបានស្វែងយល់ពីសម្បូរសម្បត្តិវប្បធម៌ខ្មែរ និង តំបន់ទេសចរណ៍ផ្សេងៗរបស់ខ្មែរ។
លើសពីនេះ ថ្មីៗនេះ អ្វីដែលធ្វើឱ្យមហាជនអ្នកគាំទ្រកម្ពុជាកាន់តែរំភើបចិត្តទៀត ខណៈបានទទួលដំណឹងថាតារាសម្ដែងបូលីវូដលោក GAGAN Malik មកកាន់កម្ពុជាលើកនេះ ត្រូវបានតែងតាំងក្លាយជាទូតសុច្ឆន្ទៈប្រចាំក្រសួងទេសចរណ៍កម្ពុជាទៀតផង។
នេះបើតាមការបង្ហោះជូនដំណឹងលើហ្វេសប៊ុកផេករបស់ក្រសួងព័ត៌មានបានសរសេរថា ៖ «លោក Gagan Malik (តារា Bollywood ឥណ្ឌាដែលសម្តែងជាតួអង្គព្រះពុទ្ធ) ត្រូវបានតែងតាំងជាទូតសុច្ឆន្ទៈជាផ្លូវការប្រចាំក្រសួងទេសចរណ៍កម្ពុជា»៕
