កាលពីយប់ថ្ងៃទី ១៥ ខែកក្កដា ឆ្នាំ ២០២៥ កន្លងទៅនេះ ភូមិចំនួន ៣ នៅក្នុងស្រុកឈៀងដាវ ខេត្តឈៀងរ៉ៃ ប្រទេសថៃ ត្រូវបានទឹកជំនន់ហូរពីព្រៃវាយប្រហារភ្លាម បណ្តាលឱ្យប្រជាជនបង្ខំចិត្តជម្លៀសខ្លួនចេញពីផ្ទះសម្បែងទៅរកកន្លែងសុវត្ថិភាព។
តាមព័ត៌មានបានឱ្យដឹងថា ស្រុកឈៀងដាវ ខេត្តឈៀងរ៉ៃ មានស្ថានការណ៍គួរឱ្យព្រួយបារម្ភ ដោយនៅក្នុងតំបន់ Muang Na មានភូមិចំនួន ៣ គឺភូមិ Ban Na Wai ភូមិ Lo Pa Han និង Ban Huai Sai មានទឹកជំនន់ដែលហូរពីព្រៃហូរចូលមក បង្កឱ្យមានការជន់លិចភ្លាមៗ ដោយប្រជាជនមិនបានមានការត្រៀមខ្លួនមុនឡើយ។ លើសពីនេះទៅទៀត កម្ពស់ទឹកទន្លេ Ping មានការហក់ឡើងជាងមុខរហូតដល់ ១ ម៉ែត្រ ដែលកាន់តែបង្កឱ្យមានការព្រួយបារម្ភ។
ដោយឡែក អាជ្ញាធរមូលដ្ឋាន រួមនឹងថ្នាក់ដឹកនាំសហគមន៍ បានប្រកាសអាសន្នដល់អ្នកភូមិ ឱ្យរៀបចំជម្លៀសខ្លួន ក៏ដូចជារើរបស់មានតម្លៃទាំងឡាយ ព្រមទាំងសត្វចិញ្ចឹមទៅកាន់ទីទួលខ្ពស់ជាបណ្តោះអាសន្នសិន ហើយតាមដានស្ថានការណ៍ទឹកជំនន់ជាបន្តទៀត៕
ប្រភព៖ Khaosod
