ថ្មីៗនេះ មានរឿងក្តីដ៏គួរឱ្យហួសចិត្តមួយ បានកំពុងតែផ្ទុះល្បីនៅតាមបណ្តាញសង្គមរបស់ចិន ដែលមានបុរសម្នាក់ ឈ្លោះគ្នាជាមួយប្រពន្ធ តែបែរជាទៅរួមគំនិតគ្នាជាមួយបងប្អូនជីដូនមួយ រៀបគម្រោងការសម្លាប់កូនប្រុសខ្លួនឯងបានសម្រេច ដើម្បីយកលុយធានារ៉ាប់រង។
តាមព័ត៌មានបានរៀបរាប់ឱ្យដឹងថា ហេតុការណ៍នេះបានកើតឡើងតាំងពីឆ្នាំ ២០២០ កន្លងទៅ ដោយបុរសខាងលើនេះ ជាអ្នកស្រុករស់នៅទីក្រុង Sanming ខេត្ត Fujian។ នៅក្នុងខែមេសា ឆ្នាំ ២០២០ នោះ បុរសនេះចាប់ផ្តើមឈ្លោះគ្នាជាមួយនឹងប្រពន្ធជាប្រចាំ ដោយសារតែរឿងលុយកាក់ និងរឿងក្បត់ចិត្ត។ ដោយសារតែមានគំនុំនឹងប្រពន្ធ បុរសនេះក៏បានរៀបផែនការសម្លាប់កូនប្រុសបង្កើតដែលមានវ័យត្រឹម ៦ ឆ្នាំ ដោយរួមដៃគ្នាជាមួយនឹងបងប្អូនជីដូនមួយ។
លុះមកដល់ខែតុលា ឆ្នាំ ២០២០ បុរសនេះក៏បានចាប់ផ្តើមគម្រោងការរបស់ខ្លួន ដោយបានយកឡានដឹកកូនប្រុសចេញទៅក្រៅផ្ទះ ហើយប្រាប់ឱ្យកូនចេញមកចាំនៅខាងក្រៅឡាន រួចក៏បានឱ្យបងប្អូនជីដូនមួយបើកឡានដឹកទំនិញមកបំបុកឡាននោះមួយទំហឹង រហូតដល់កូនស្លាប់នៅនឹងកន្លែង។ បុរសនេះបានសម្តែងសម្រក់ទឹកភ្នែកនៅនឹងមុខប៉ូលិស ហើយលាក់បាំងទំនាក់ទំនងខ្លួនជាមួយនឹងអ្នកបង្កហេតុ ដែលជាបងប្អូនជីដូនមួយរបស់ខ្លួន។ ប៉ុន្មានខែក្រោយមក បុរសនេះក៏បានទទួលលុយធានារ៉ាប់រងជីវិតរបស់កូនប្រមាណជា ២៥ ០០០ ដុល្លារ រួចក៏ចែកឱ្យបងប្អូនជីដូនមួយនោះប្រហែលជាង ៤ ០០០ ដុល្លារ។
ចុងក្រោយរឿងរ៉ាវបានបែកធ្លាយការពិត ក្រោយចៅហ្វាយរបស់បុរសជនបង្កលបស្តាប់ដឹងពីគម្រោងការ ហើយក៏បានទម្លាយរឿងនេះទៅកាន់ប៉ូលិស ក្នុងនោះបុរសជាឪពុកត្រូវបានតុលាការកាត់ទោសប្រហារជីវិត តែបានប្តឹងឧទ្ធរណ៍សុំការលើកលែងទោស រីឯបុរសដែលជាប្អូនជីដូនមួយ ត្រូវបានតុលាការកាត់ទោសប្រហារជីវិតដូចគ្នា តែអនុញ្ញាតពន្យារពេលឱ្យកែខ្លួន ២ ឆ្នាំ ទើបអាចរួចទោស៕
ប្រភព៖ SCMP
