មុនឈានដល់វគ្គប្រកួតផ្ដាច់ព្រ័ត្រ ១ ថ្ងៃ ពោលគឺនៅល្ងាចថ្ងៃទី ២៥ ខែមិថុនា ឆ្នាំ ២០២៥ នេះ កម្មវិធីប្រកួតសម្រស់អន្តរជាតិ Miss Supranational 2025 ក៏បានរៀបចំប្រកួតវគ្គបង្ហាញឈុតតំណាងជាតិ ដែលជាវគ្គប្រកួតដ៏សំខាន់សម្រាប់ការបង្អួតសម្រស់របស់បវរកញ្ញាតំណាងប្រទេសនីមួយៗ ក៏ដូចជាឈុតតំណាងជាតិដែលរចនាយ៉ាងល្អឯកប្រចាំប្រទេសរបស់ខ្លួនលើឆាកដ៏ធំអស្ចារ្យនៃកម្មវិធីនេះ។
តាមរយៈវីដេអូផ្សាយផ្ទាល់ក្នុងវគ្គបង្ហាញឈុតតំណាងជាតិនេះដែរ ឃើញថាបវរកញ្ញាតំណាងកម្ពុជាយើង កញ្ញា ឈុំ ចាន់ដារ៉ា បានធ្វើឱ្យមហាជនអ្នកគាំទ្រមានការរំភើបចិត្ត និង មានមោទកភាពជាខ្លាំងចំពោះរូបនាង ដែលដើរបង្ហាញឈុតតំណាងជាតិលើឆាកដ៏អស្ចារ្យនេះបានយ៉ាងល្អ ទន់ភ្លន់ស្រស់ស្អាត និង លេចធ្លោខ្លាំង។
ឈុតតំណាងជាតិដ៏ប្រណីតដែលបវរកញ្ញា ឈុំ ចាន់ដារ៉ា ដើរបង្ហាញលើឆាកដ៏អស្ចារ្យនេះ មានឈ្មោះថា «របាំផ្កាមាសផ្កាប្រាក់» និង អត្ថន័យថា ៖ «របាំនេះស្តែងពីទេពនិករហត្តកាន់ផ្កាមាសផ្កាប្រាក់រេរាំអឺងកង ជាមង្គលសួស្តី។ របាំផ្កាមាសផ្កាប្រាក់ នេះនិយមសម្តែងនាពាលាធំៗនៃព្រះរាជពិធីគ្រងបរមសិរីរាជ្យសម្បត្តិ ព្រះរាជពិធីចំរើនព្រះជន្ម ហ្លួងម្ចាស់ផែនដី ឬសម្តែងដើម្បីបើករោង ជាការបួងសួងជាដើម មានតតាំងពីរាជ្យផែនដីព្រះករុណានរោត្ដមមកម្ល៉េះ។ របាំនេះតាមឃើញក្នុងឯកសារកុនរបស់របាំ ត្រង់ព្រះករុណាព្រះស៊ីសុវត្ថិទ្រង់ប្រពាន (ពពាន) ព្រះមហានគរធំ ឃើញមានក្រុមល្ខោនហ្លួងរាំរបាំផ្កាមាសផ្កាប្រាក់មានតួរនាងរាំផងដែរ។ គ្រឿងប្រដាប់យោងតាមសម័យកណ្តាលអមនឹងបច្ចុប្បន្នដកស្រង់តាមលំនាំវង់ល្ខោនព្រះករុណានៃព្រះរាជាណាចក្រកម្ពុជា ដោយតួរឈុតទាំងមួយបង្ហាញពីតួរធំទាំងពីររួមមាន នាងនឹងនាយរោង ដែលជាតួនៃរបាំផ្ទាល់»៕
សូមចុចទីនេះដើម្បីទស្សនាវីដេអូ៖
