នៅរសៀលថ្ងៃទី ០៦ ខែមីនា ឆ្នាំ ២០២៥ ស្នងការដ្ឋាននគរបាលខេត្តកំពត បានជូនដំណឹងពីចំណាត់ការទៅលើស្ត្រីដែលជាជនជាតិបរទេសមួយរូប បានបាញ់ថ្នាំពណ៌ទៅលើបង្កាន់ដៃស្ពានកំពង់បាយ ស្ថិតក្នុងភូមិសាស្ត្រក្រុងកំពត។
ទាក់ទិនទៅនឹងរឿងនេះ ស្នងការដ្ឋាននគរបាលខេត្តកំពត បានបង្ហោះរូបភាពភ្ជាប់ជាមួយសារថា ៖ «ប្រទេសខ្ញុំ ខេត្តខ្ញុំ មានច្បាប់ទំលាប់ត្រឹមត្រូវ មិនមែនអ្នកឯងចង់ធ្វើអ្វីស្រេចតែអំពើចិត្តនោះទេ អ្នកត្រូវត្រលប់មកសម្អាតស្ពានឱ្យបានដូចដើមឡើងវិញ»។
តាមប្រភពបានឱ្យដឹងទៀតថា បច្ចុប្បន្នសមត្ថកិច្ចកំពុងចុះទៅអន្តរាគមន៍ស្ត្រីជនជាតិបរទេស ដែលបានបាញ់ថ្នាំលើបង្កាន់ដៃស្ពានកំពង់បាយ ដើម្បីធ្វើការតាមនិតិវិធីច្បាប់ និង ត្រូវសម្អាតឱ្យបានស្អាតដូចដើមឡើងវិញ៕
