មហាជនអ្នកប្រើប្រាស់បណ្ដាញសង្គម បាននាំគ្នាផ្ទុះការចាប់អារម្មណ៍ និង ស្ងើចសរសើរចំពោះស្មារតីស្នេហាជាតិរបស់ក្មេងប្រុសមួយរូប រៀនថ្នាក់ទី ៤ មានទឹកចិត្តចង់ជួយកងទ័ពខ្មែរ ដោយបានបោកកូនជ្រូកដែលជាប្រាក់សន្សំរបស់ខ្លួន បានថវិកាជាង ១ លានរៀល ក៏ប្រមូលយកមកជួយបរិច្ចាគជូនកងទ័ពខ្មែរទាំងអស់។
វីដេអូដែលកំពុងផ្ទុះការស្ងើចសរសើរនេះផងដែរ ត្រូវបានបង្ហោះដោយផេក The Morning ប្រមាណជិត ២ នាទី បង្ហាញពីរឿងរ៉ាវក្មេងប្រុស រៀនថ្នាក់ទី ៤ កាន់ថវិកាចំនួន ១ ៣៧៣ ៥០០ រៀល (មួយលានបីសែនប្រាំពីរម៉ឺនបីពាន់ប្រាំរយរៀល) យកមកជួយវីរកងទ័ពកម្ពុជា ខណៈលុយទាំងនោះគឺបានមកពីសន្សំក្នុងកូនជ្រូករបស់គេ ដែលសកម្មភាពនេះបានបង្ហាញពីស្មារតីស្នេហាជាតិរបស់កូនខ្មែរពុំអាចកាត់ថ្លៃបានឡើយ។
តាមរយៈវីដេអូបានឱ្យដឹងថា ក្មេងប្រុសបានសម្រេចចិត្តយកថវិកាមកបរិច្ចាគបន្ទាប់ពីរូបគេបើកហ្វេសប៊ុក ហើយបានឃើញវីរទាហានការពារជាតិកម្ពុជាមួយចំនួន បានចូលមន្ទីរពេទ្យ និង ត្រូវការជំនួយ ទើបគេសម្រេចចិត្តបោកកូនជ្រូកមកចូលរួមបរិច្ចាគតាមរយៈ The Morning តែម្ដង៕
