រយៈពេល ២ ឆ្នាំមកហើយ ដែលតារាស្រី ឌួង ហ្សូរីដា បានបាត់បង់អ្នកម្ដាយជាទីគោរពស្រឡាញ់គ្មានថ្ងៃត្រឡប់ ដែលនាងតែងបង្ហាញនូវក្ដីនឹករឮកអាល័យដល់អ្នកម្ដាយលើបណ្ដាញសង្គម ក៏ដូចជាសកម្មភាពរៀបចំធ្វើបុណ្យឧទ្ទិសកុសលជូនអ្នកម្ដាយផងដែរ។
លើសពីនេះ កាលពីដើមឆ្នាំ ២០២៤ កន្លងទៅ តារាស្រី ឌួង ហ្សូរីដា ក៏បានបង្ហោះទាក់ទងនឹងក្ដីស្រមៃរបស់អ្នកម្ដាយពេលនៅមានជីវិត ដែលនាងបានសម្រេចទិញបង់រំលួសផ្ទះវីឡាដ៏ស្កឹមស្កៃមួយរយៈពេល ៥ ឆ្នាំ ដើម្បី Surprise អ្នកម្ដាយតាំងពីមុនពេលចែកឋាន ប៉ុន្តែត្រូវបានខកបំណងវិញដោយសារអ្នកម្ដាយបានចាកចេញមុនពេល តែយ៉ាងណាតារាស្រីរូបនេះ ក៏បន្តសាងសង់ផ្ទះមួយនេះដើម្បីសម្រេចបំណងអ្នកម្ដាយរហូតមក។
យ៉ាងណាមិញ មកដល់ថ្មីៗនេះ តារាស្រី ឌួង ហ្សូរីដា ក៏បានសម្រេចក្ដីស្រមៃរបស់អ្នកម្ដាយហើយ ដែលផ្ទះវីឡាដ៏ធំស្កឹមស្កៃរបស់នាងបានសាងសង់រួចរាល់ និង បានរៀបចំចូលរស់នៅដែរ ដោយតារាស្រីរូបនេះក៏បានរៀបចំកន្លែងសម្រាប់អញ្ជើញអ្នកម្ដាយលោកឪពុក ក៏ដូចជាជីដូនជីតាចូលនៅក្នុងផ្ទះថ្មីនេះជុំគ្នាផងដែរ។
ក្នុងនោះ អ្វីដែលកាន់តែចាប់អារម្មណ៍ និង សរសើរពីទឹកចិត្តកូនស្រីដ៏កតញ្ញូរូបនេះ ដែលឃើញថាផ្ទះវីឡាថ្មីដ៏ស្កឹមស្កៃនេះ កញ្ញា ឌួង ហ្សូរីដា បានបញ្ជាក់ថាផ្ទះរបស់អ្នកម្ដាយ និង បានដាក់ផ្លាកឈ្មោះរបស់អ្នកម្ដាយផ្ទាល់ គឺហៅថា «លោកម៉ែ Residence» ទៀតផង។
ក្នុងនោះ កញ្ញា ឌួង ហ្សូរីដា បានបង្ហោះរៀបរាប់ថា ៖ «30-មិថុនា-25 វេលាម៉ោង 9.40 នាទី ព្រឹក គោរពអញ្ជើញលោកម៉ែ Lim Yalin លោកឪពុក ឌួង ស៊ីផល ព្រមទាំងកុងម៉ា ជីដូនជីតា ពីផ្ទះចាស់ ចូលមកនៅផ្ទះថ្មី ដែលជាផ្ទះក្នុងក្តីស្រមៃរបស់លោកម៉ែ ហើយជាបំណងដ៏ធំបំផុតរបស់លោកចង់មានបន្ទប់ផ្ទាល់ សម្រាប់តម្កល់ជើងធូបដូនតាឱ្យបានត្រឹមត្រូវ និង បន្ទប់ថ្វាយបង្គុំព្រះសម្រាប់ការប្រតិបត្តិធ៌មរៀងរាល់ថ្ងៃសីល ជាថ្ងៃដែលរីករាយបំផុតដែលពួកយើងទាំងអស់គ្នាអាចមកជួបជុំគ្នាក្នុងផ្ទះតែមួយនេះ ទោះបីយើងមិននៅភពជាមួយគ្នា ប៉ុន្តែកូនៗចៅៗដឹងថា បុព្វការីជនរបស់យើង លោកទទួលបាននូវកុសលផលបុណ្យ និង ការដឹងគុណអំពីកូនចៅជំនាន់ក្រោយនេះ»៕
