កក្រើកក្នុងស្រទាប់ហ្វេន! ប៊ី សុធារី ទម្លាយរឿងភ្ញាក់ផ្អើលមួយ ក្រោយចុះពីឆាកប្រកួត MCC 2025 យប់មិញ

លើបណ្ដាញសង្គមមហាជនអ្នកគាំទ្រវិស័យបវរកញ្ញាតាមដានកម្មវិធី Miss Cosmo Cambodia 2025 កំពុងចែករំលែកបង្ហាញការអបអរដោយក្ដីពេញចិត្តខ្លាំងចំពោះម្ចាស់ជ័យលាភីគ្រងមកុដថ្មី MCC 2025 កញ្ញា ផន ស្រីពី ព្រោះមើលឃើញពីភាពលេចធ្លោរបស់នាងទាំងសមត្ថភាព និង ចំណេះដឹងស័ក្តិសមបំផុតតំណាងឱ្យកម្ពុជាឈរឆាកអន្តរជាតិ។

ក្រៅពីចែករំលែកបង្ហាញការអបអរគាំទ្រដល់ម្ចាស់មកុដថ្មីនៃកម្មវិធី Miss Cosmo Cambodia 2025 ឃើញថាចំពោះលំដាប់រងទី ១ MCC 2025 កញ្ញា ប៊ី សុធារី ក៏កំពុងទទួលបានការចែករំលែកអបអរលើកទឹកចិត្ត និង មានការសោកស្ដាយចំពោះនាងផងដែរ ដោយមិនអាចដណ្ដើមបានជ័យលាភីគ្រងមកុដក្នុងកម្មវិធីនេះ។

យ៉ាងណា ដ្បិតតែមិនមានឱកាសក្លាយជាម្ចាស់ជ័យលាភីគ្រងមកុដ Miss Cosmo Cambodia 2025 មែន ប៉ុន្តែកញ្ញា ប៊ី សុធារី ក៏ឆក់បានក្ដីស្រឡាញ់ និង សរសើរពីមហាជនទូទាំងប្រទេសចំពោះសមត្ថភាពរបស់នាង ជាពិសេសភាពលេចធ្លោក្នុងថ្ងៃប្រកួតផ្ដាច់ព្រ័ត្រនេះ ដែលបានប្រកួតប្រជែងបង្ហាញសមត្ថភាពដ៏អស្ចារ្យពីមួយវគ្គទៅមួយវគ្គ និង ទទួលបានពានរង្វាន់ចំនួន ៣ បន្ថែមទៀត គឺ Best in RUNWAY CHALLENGE, Miss IDOL Winner, DARLING OF THE CROWD Winner។

ដោយឡែក អ្វីដែលធ្វើឱ្យមហាជនកំពុងចាប់អារម្មណ៍ខ្លាំងទៀតចំពោះជ័យលាភីរង ១ MCC 2025 រូបនេះ បន្ទាប់ពីប្រកួតចប់ចុះពីលើឆាកភ្លាម កញ្ញា ប៊ី សុធារី បានរៀបរាប់ក្នុងកិច្ចសម្ភាសទម្លាយយ៉ាងភ្ញាក់ផ្អើលទាក់ទងនឹងការប្រកួតកន្លងមក ដែលនាងបានឱ្យដឹងថាក្នុងអំឡុងពេលប្រកួតកន្លងទៅនាងធ្លាប់មានបំណងមិនបន្តការប្រកួតម្ដងហើយ ប៉ុន្តែដោយសារមានការលើកទឹកចិត្តខ្លាំងពីកម្មវិធីទើបនាងបន្តប្រកួតមកដល់ពេលនេះ និង ធ្លាប់ប្រាប់កម្មវិធីថានាងនឹងមិនចង់បានអ្វីពីការប្រកួតនេះទៀតផង។

ក្នុងនោះ កញ្ញា ប៊ី សុធារី បានរៀបរាប់ថាប្រាប់អ្នកសារព័ត៌មានថា ៖ «តាមពិតទៅខ្ញុំធ្លាប់អត់ចង់បន្តការប្រកួតហ្នឹងតាំងពីមុនចូលឆ្នាំ ព្រោះខ្ញុំធ្លាប់ប្រាប់កម្មវិធីដែរថា ខ្ញុំនឹងនៅបន្តការប្រកួតរហូតដល់ចប់ តែខ្ញុំអត់យកអ្វីទាំងអស់ ប៉ុន្តែខាងកម្មវិធីបានលើកទឹកចិត្តដោយជឿជាក់លើខ្ញុំ ឱ្យខ្ញុំបន្តការប្រកួតរហូតមកឥឡូវហ្នឹង ហើយខ្ញុំក៏ព្យាយាមធ្វើឱ្យអស់ពីសមត្ថភាពរបស់ខ្ញុំក្នុងការប្រកួតក្នុងរាត្រីនេះ ទោះបីខ្ញុំអត់ជាប់ The Winner Miss Cosmo Cambodia ប៉ុន្តែខ្ញុំក៏នៅតែសប្បាយចិត្ត ព្រោះខ្ញុំធ្វើបានអស់ពីសមត្ថភាពរបស់ខ្ញុំហើយ ហើយខ្ញុំទទួលបានការគាំទ្រ និង ក្ដីស្រឡាញ់ច្រើនខ្លាំងមែនទែន ហើយក៏សូមអបអរសាទរដល់ម្ចាស់មកុដថ្មី Miss Cosmo Cambodia ផន ស្រីពី ផងដែរ និង សង្ឃឹមនាងនឹងធ្វើបានល្អក្នុងការប្រកួតលើឆាកអន្តរជាតិខាងមុខ»៕