ជាការពិតណាស់ អ្នកនិយមលេងម៉ូដទូរស័ព្ទសេរី iPhone ច្បាស់ជាបានជ្រាបហើយ កាលពីយប់ថ្ងៃទី ០៩ ខែកញ្ញា ឆ្នាំ ២០២៥ (ម៉ោងនៅកម្ពុជា) ក្រុមហ៊ុន Apple បានប្រកាសសម្ពោធម៉ូឌែលទូរស័ព្ទ iPhone 17 series ដែលមាន iPhone 17, iPhone Air, iPhone 17 Pro និង iPhone 17 Pro Max។
ក្នុងនោះ ក្រោយក្រុមហ៊ុន Apple បានបញ្ជាក់ពីតម្លៃ ទៅតាមប្រភេទនីមួយៗហើយនោះ ក៏ឃើញមានអ្នកលេងបណ្តាញសង្គមហ្វេសប៊ុក ជាពិសេស សិល្បករ សិល្បការិនីជាច្រើនក៏បានបង្ហាញការចាប់អារម្មណ៍ និង ត្រៀមទិញរួចជាស្រេចទៀតផង។
យ៉ាងណាមិញ អ្វីកំពុងតែភ្ញាក់ផ្អើលសម្រាប់អ្នកនាង ឡុង ម៉ានីន គូស្នេហ៍របស់តារាចម្រៀង លោក ថុល សុភិទិ គឺនៅរសៀលថ្ងៃទី ១១ ខែកញ្ញា ឆ្នាំ ២០២៥ អ្នកនាងបានបង្ហោះសារបន្ទាន់មួយជម្រាបដល់មហាជន និង មិត្តភក្តិថា មានជនឆ្លៀតឱកាសបានយករូបថតនាង ទៅបង្ហោះលក់ទូរស័ព្ទដៃ។ អ្នកនាង ឡុង ម៉ានីន បានបង្ហោះសារថា៖ «ជួយស៊ែរបន្ទាន់ ផេកមួយចំនួនយករូបថតខ្ញុំបង្កើតផេកផុសលក់ទូរស័ព្ទបោកគេ បញ្ជាក់ ខ្ញុំនីនអត់មានលក់ទូរស័ព្ទទេ»៕
