មហាជននិយមតាមដានកម្មវិធី 3 Fun មួយរយៈចុងក្រោយនេះ ច្បាស់ជាបានជ្រាបហើយ ពីការបាត់វត្តមានរបស់អ្នកនាង គង់ ចាន់ស្រីមុំ ក្នុងនាមជាពិធីការិនី ខណៈបានឃើញ អ្នកនាង ខៀវ សានសាណា បានចូលខ្លួនមកជំនួសវិញ។
ក្នុងនោះដែរ បើក្រឡេកទៅមើលសកម្មភាពរបស់អ្នកនាង គង់ ចាន់ស្រីមុំ ក្រោយពីបាត់មុខក្នុងនាមជាពិធីការិនីរបស់ 3 Fun មហាជនក៏បានឃើញថា តារាស្រីរូបនេះ ក៏មមាញឹកដូចធម្មតា ដោយថ្មីៗនេះ គេបានឃើញ អ្នកនាង គង់ ចាន់ស្រីមុំ ទៅក្រៅប្រទេសញឹកញាប់ ដើម្បីពង្រីកមុខជំនួយថ្មីទៀតផង។
យ៉ាងណាមិញ ថ្មីៗនេះ អ្នកនាង គង់ ចាន់ស្រីមុំ ក៏បានបង្ហាញវត្តមានក្នុងកម្មវិធី 3 Fun ជាថ្មី ក្នុងនាមជាតារាកិត្តិយសវិញម្តង ដោយការឡើងកម្មវិធីលើកនេះ អ្នកនាង គង់ ចាន់ស្រីមុំ ក៏បានទម្លាយពីមូលហេតុនៃការចាកចេញពី 3 Fun ក្រោយកាន់តំណែងជាពិធីការិនីអស់រយៈពេលជាង ៦ ឆ្នាំ។
តាមរយៈកិច្ចសម្ភាសន៍ អ្នកនាង គង់ ចាន់ស្រីមុំ បានឱ្យដឹងថា ការចាកចេញនេះ ក៏ព្រោះតែនាងមានគម្រោងជាមួយស្វាមី យកកូនម្នាក់ទៀត។ លើសពីនោះ អ្វីដែលសំខាន់បំផុតនោះ គឺអ្នកនាង មមាញឹកខ្លាំងក្នុងការរកស៊ី ដោយមិនអាចបែងចែកពេលវេលាបាន៕
