ក្រោយស្ថានភាពប្រទេសជាតិមានភាពល្អប្រសើរឡើងវិញបន្តិច ពេលនេះលើបណ្ដាញសង្គមមហាជនកម្ពុជា នៅតែបន្តរួបរួមគ្នាជាកម្លាំងស្មារតីស្នេហាជាតិតាមរយៈសកម្មភាពផ្សេងៗ ជាពិសេសមហាជនកម្ពុជាក៏កំពុងបង្ហាញការពហិកាមិនប្រើប្រាស់នូវផលិតផល ដែលនាំចូលពីប្រទេសថៃបន្តទៀត។
លើសពីនេះ ជាមួយនឹងការពហិកាមិនប្រើប្រាស់ និង មិនបន្តនាំចូលផលិតផលថៃនេះដែរ មហាជនកម្ពុជាក៏កំពុងបង្ហាញការជួយលើកស្ទួយនូវផលិតផលក្នុងស្រុក ដែលលើកទឹកចិត្តឱ្យមានការផលិតរបស់ប្រើប្រាស់ គ្រឿងសំអាង សម្ភារៈ ម្ហូបអាហារផ្សេងៗដោយស្នាដៃកូនខ្មែរផងដែរ។
ស្របពេលនេះដែរ ក្រឡេកមើលហ្វេសប៊ុករបស់តារាចម្រៀងស្រី ពេជ្រ សូលីកា ក៏បានបង្ហាញការជួយលើកស្ទួយគាំទ្រនូវផលិតផលខ្មែរដែរ ដោយនាងបានប្រកាសជូនដំណឹងដល់បងប្អូនកសិករខ្មែរ ដែលដាំបន្លែធម្មជាតិទាំងអស់ទូទាំងប្រទេស គឺនាងនឹងជួយធ្វើការផ្សព្វផ្សាយជូនដោយឥតគិតថ្លៃទៀតផង។
ក្នុងនោះ អ្នកនាង ពេជ្រ សូលីកា បានបង្ហោះលើហ្វេសប៊ុករៀបរាប់ថា ៖ «នាងខ្ញុំ សូមប្រកាសសម្រាប់បងប្អូនកសិករ ដែលដាំបន្លែធម្មជាតិទាំងអស់ទូទាំងប្រទេសកម្ពុជា នាងខ្ញុំទទួលផ្សព្វផ្សាយជូនដោយមិនគិតកម្រៃ»៕
