គេថាបើគេមិនឱ្យតម្លៃយើង យើងកុំនៅបន្តទៀត។ ជាការពិត នៅកន្លែងធ្វើការមានបុគ្គលិកមិនតិចទេជួបរឿងបែបនេះ ដែលមេលែងផ្តល់តម្លៃ លែងប្រើជាបុគ្គលិកតទៅទៀត ដោយបង្ហាញទង្វើផ្សេងៗ រហូតបុគ្គលិកដាក់ពាក្យលាឈប់ ឬ ត្រូវបានគេបញ្ឈប់។ ខាងក្រោមនេះ ជាសញ្ញា ៥ យ៉ាង បង្ហាញថា មេលែងចង់វិនិយោគលើអ្នកទៀតនៅក្នុងក្រុមហ៊ុន។
១. ដកចេញពីការប្រជុំ ឬ គម្រោងសំខាន់ៗ
បើសម្គាល់ឃើញថា អ្នកលែងត្រូវបានគេឱ្យចូលរួមក្នុងការងារសំខាន់ ការប្រជុំ ឬនិយាយអំពីគម្រោងធំៗ វាជាសញ្ញាបញ្ជាក់ថា តួនាទីរបស់អ្នកកំពុងត្រូវបានគេដាក់ឱ្យនៅដោយឡែក ឬកាន់តែឆ្ងាយ ឬលែងមានភាពសំខាន់ទៀតហើយ។
២. បន្ទុកការងារថយចុះ
សព្វមួយដង អ្នកមានការងារច្រើនសឹងតែរកពេលសម្រាកគ្មាន។ តែបើការងាររបស់អ្នកឥលូវហាក់ដូចជាទំនេរច្រើន គ្មានសួរនាំពីហេតុផលយុទ្ធសាស្ត្រ មានន័យថា បើទុកអ្នកទៀតក៏គ្មានបានការដែរ។
៣. ទំនាក់ទំនងកាន់តែឆ្ងាយ
នៅពេលមេចាប់ផ្តើមរឹតបន្តឹងអ្វីៗផ្លូវការឡើងវិញ ផ្តល់មតិកែលម្អម៉ាត់ៗ ឬលែងសូវប្រាស្រ័យទាក់ទងជាមួយអ្នក នេះបង្ហាញពីការលែងទុកចិត្ត និង លែងចាប់អារម្មណ៍លើវត្តមានរបស់អ្នកតទៅទៀត។
៤. ផ្តល់ការឆ្លើយតបយឺត
មនុស្សដែលសំខាន់ គេនឹងឆ្លើយតបលឿនតាមដែលអាចធ្វើទៅបាន។ តែបើគ្មានប្រយោជន៍អ្វីទៀត គេនឹងលែងខ្វាយខ្វល់ លែងយកដាក់ក្នុងភ្នែកទៀតហើយ។ មានន័យថា មេលែងវិនិយោគលើអ្នកសម្រាប់អភិវឌ្ឍន៍ក្រុមហ៊ុន ឬ លែងចង់ឱ្យដើរទៅមុខជាមួយក្រុមហ៊ុនបន្តទៀត។
៥. លែងគាំទ្រ
មិនថាអ្នកប្រឹងប្រែងការងារប៉ុនណា ឬបញ្ចេញមតិយោបល់ច្រើនយ៉ាងណា មេរបស់អ្នកលែងចាប់អារម្មណ៍ និង មិនគាំទ្រអ្នកតទៀតទេ។ ជួនកាល អាចបង្ហាញឱ្យឃើញស្តែងៗ ដោយគេនឹងយកចិត្តទុកដាក់ទៅលើបុគ្គលណាម្នាក់ ដែលនឹងមកជំនួសអ្នក៕
