ជាការពិតណាស់ រយៈពេល ២ ឆ្នាំចុងក្រោយនេះ តារាចម្រៀងរ៉េបស្រីល្បីឈ្មោះរបស់ប្រទេសជប៉ុន Awich ហាក់ទទួលបានប្រជាប្រិយភាពទទួលបានការគាំទ្រពីសំណាក់អ្នកនិយមវិស័យរ៉េបរបស់កម្ពុជា បន្ទាប់ពីនាងបានសហការ និង ច្រៀងរួមគ្នានឹងតារាចម្រៀងរ៉េប វណ្ណដា។
ក្នុងនោះ Awich ធ្លាប់បានអញ្ជើញមកចូលរួមសម្តែងក្នុងកម្មវិធី The Rapper Cambodia រដូវកាលទី ១ ក្នុង វគ្គផ្តាច់ព្រ័ត្រ និង បានចេញចម្រៀងរួមគ្នានឹង វណ្ណដា មានចំណងជើងថា «6 YEARS IN THE GAME» និង នៅដើមឆ្នាំ ២០២៥ តារាចម្រៀងរ៉េបរូបនេះ បានមកថត MV រួមគ្នាជាថ្មីម្តងទៀតនឹង វណ្ណដា នៅលើទឹកដីខេត្តសៀមរាបក្នុងបទ «Asian State of Mind»។
មិនត្រឹមតែប៉ុណ្ណោះ នៅដើមខែឧសភា ពោលគឺមុននឹងការអញ្ជើញមកកាន់ការប្រគំតន្ត្រីទោលរបស់ វណ្ណដា នៅថ្ងៃទី ១៧ ខែឧសភា ឆ្នាំ ២០២៥ ខាងមុខនេះ Awich ក៏បានមកថតវីដេអូឯកសារជាមួយ វណ្ណដា នៅឯផ្សារលើ ទឹកដីក្រុងព្រះសីហនុ ថែមទៀតផង។
ដោយឡែក ងាកទៅកាន់រឿងរ៉ាវខ្លះៗរបស់ Awich ឯនោះវិញ អាចនឹងមានអ្នកគាំទ្រមួយចំនួនមិនទាន់បានដឹងនោះទេ ដោយ Awich មានជីវិតតស៊ូខ្លាំងលើវិថីសិល្បៈ និង មានរឿងរ៉ាវជូរចត់ខ្លះក្នុងជីវិតឯកជនទៀតផង។
១. ជីវិតសិល្បៈ
បើនិយាយពីតារារ៉េបនៅប្រទេសជប៉ុន Awich ត្រូវបានចាត់ទុកថាជារាជិនីរ៉េប និង ជាតារាចម្រៀងរ៉េបស្រីដំបូងគេបង្អស់ក្នុងប្រទេសជប៉ុន។ Awich ជាសិល្បករដែលបង្ហាញខ្លួនដំបូងនៅក្រុមហ៊ុនថតតន្ត្រី Universal Music Japan ក្នុងឆ្នាំ ២០២០។ លើសពីនោះ នាងក៏បានឈ្នះបានពានរង្វាន់ជាតារារ៉េបអន្តរជាតិឆ្នើមក្នុងប្រទេសជប៉ុន នៅឆ្នាំ ២០២២ ទៀតផង។
កន្លងមក Awich ធ្លាប់បាននិយាយក្នុងបទសម្ភាសថា នាងជក់ចិត្តនឹងវិស័យ Hip hop តាំងពីអាយុ ១៣ ឆ្នាំ ដោយចេះតែងនិពន្ធបទចម្រៀងផ្ទាល់ខ្លួន ហើយចេញផ្សាយបទដំបូងកាលនាងមានអាយុ ១៤ ឆ្នាំ និង ត្រូវបានគេទទួលស្គាល់ពីសមត្ថភាពទាំងវ័យក្មេងរបស់នាងរហូតមកដល់បច្ចុប្បន្ន។
២. ជីវិតឯកជន
Awich កើតនៅខែធ្នូ ឆ្នាំ ១៩៨៦ ដោយពេលនេះ នាងមានអាយុជាង ៣៨ ឆ្នាំ។ Awich សព្វថ្ងៃគឺជាស្ត្រីមេម៉ាយ ដែលមានកូនស្រីម្នាក់មានអាយុ ១៧ ឆ្នាំ គឺនាង Toyomi Jah’mira។ ងាកទៅកាន់រឿងរ៉ាវគ្រួសារវិញនោះ Awich បានជួបនឹងស្វាមីជនជាតិអាមេរិក នៅអាយុ ១៩ ឆ្នាំ ក្រោយពីផ្លាស់ទៅរស់នៅទីក្រុង Atlanta រដ្ឋ Georgia សហរដ្ឋអាមេរិក។ ស្វាមីរបស់នាងបានបាត់បង់ជីវិតទៅហើយ ព្រោះការលួចធ្វើឃាតដោយការបាញ់សម្លាប់។
៣. កូនស្រី
មុននឹងស្វាមីទទួលមរណភាព Awich ទទួលបានចំណងដៃកូនស្រីមួយរូប នៅឆ្នាំ ២០០៨ ដោយនាង និង ស្វាមីបានដាក់ឈ្មោះកូនថា Toyomi Jah’mira។ បច្ចុប្បន្ន Toyomi មានអាយុ ១៧ ឆ្នាំហើយ រីឯសមត្ថភាពសិល្បៈវិញ Toyomi មិនចាញ់ម្តាយនោះឡើយ នាងក៏ជាតារាចម្រៀងរ៉េបមួយរូបដែរ៕
