ជាការពិតណាស់ មិនថាមនុស្សប្រុស ឬ មនុស្សស្រីនោះទេ នៅក្នុងមង្គលការតែងតែចង់ឱ្យអ្វីៗគ្រប់យ៉ាងពោរពេញដោយភាពល្អឥតខ្ចោះ ដើម្បីជាការចងចាំនៃការចាប់ផ្តើមដំណើរជីវិតក្នុងនាមជាស្វាមីភរិយា។
ក្នុងនោះ ក្រឡេកទៅមើលសិល្បករ សិល្បការិនី ក្នុងវិស័យសិល្បៈវិញ គេក៏តែងតែឃើញមានតារាភាគច្រើនបានបង្កើតអនុស្សាវរីយ៍ជូនដៃគូក្នុងថ្ងៃពិសេស ដូចជាការនិពន្ធ និង ច្រៀងចម្រៀងជូនដៃគូទៀតផង។ ជាក់ស្តែង តារាចម្រៀងស្រី ៤ រូបខាងក្រោមនេះក៏ដូចគ្នា នៅក្នុងថ្ងៃមង្គលការគឺបាននិពន្ធបទចម្រៀង និង ច្រៀងយ៉ាងពិសេសជូនស្វាមីរបស់ខ្លួន។
១. តារាចម្រៀង ឱក សុគន្ធកញ្ញា
អ្នកនាង ឱក សុគន្ធកញ្ញា បានចូលរោងការនឹងស្វាមី គឺលោក អ៊ឹង សុខលី កាលពីថ្ងៃទី ១៦ ខែឧសភា ឆ្នាំ ២០១៩។ កាលនោះ អ្នកនាង បានច្រៀងចម្រៀងយ៉ាងពិសេសជូនស្វាមីមានចំណងជើងថា «ស្រឡាញ់»។
២. តារាចម្រៀង សុគន្ធ និសា
អ្នកនាង សុគន្ធ និសា និង ស្វាមី បានចូលរៀបអាពាហ៍ពិពាហ៍កាលពីថ្ងៃទី ០១ ខែមករា ឆ្នាំ ២០១៧ ជាមួយនឹងលោក ចៅ សម្បត្តិ។ កាលនោះ តារាចម្រៀងស្រីរូបនេះក៏បានបកស្រាយចម្រៀងយ៉ាងពិសេសជូនស្វាមី ដោយមានចំណងជើងថា «ជីវិតតែមួយ»។
៣. ពិធីការិនី សុភ័ក្ត្រ កុសុម៉ា
អ្នកនាង សុភ័ក្ត្រ កុសុម៉ា និង លោក កែវ ផុនផល្លា ជាស្វាមី បានរៀបការនឹងគ្នាកាលពីថ្ងៃទី ០៤ ខែវិច្ឆិកា ឆ្នាំ ២០២៤ កន្លងទៅ។ ក្នុងពិធីមង្គលការនោះដែរ អ្នកនាង សុភ័ក្ត្រ កុសុម៉ា បានច្រៀងចម្រៀងយ៉ាងពិសេសជូនស្វាមីចំនួន ២ បទ រួមមានបទ «លានឆ្នាំពន្លឺ» និង បទ «អ៊ីម៉ា»។
៤. តារាចម្រៀង រ៉ាប៊ី
អ្នកនាង រ៉ាប៊ី និង កីឡាករបាល់ទាត់កូនកាត់ខ្មែរ-អាមេរិក លោក Nick Taylor បានរៀបការកាលពីថ្ងៃទី ៩ ខែឧសភា ឆ្នាំ ២០២៥ កន្លងទៅ។ ក្នុងនោះដែរ កញ្ញា រ៉ាប៊ី ក៏ច្រៀងចម្រៀងយ៉ាងពិសេសសម្រាប់ស្វាមីមានចំណងជើងថា «បានទេអូនសុំប៉ុណ្ណឹង»៕
