រំដួលលិចទឹក មានឈ្មោះពិតថា ម៉ិញ ចាន់វ៉ាន់ដា លោកត្រូវបានគេស្គាល់ជា អ្នកជំនាញផាត់មុខ ជាអ្នកបង្កើតសិល្បៈច្នៃប្រឌិតឈុតប្លែកៗ ជាអ្នកច្នៃម៉ូដសម្លៀកបំពាក់ ជាតារាសម្តែង ជាតារាបង្ហាញម៉ូដ និង ធ្លាប់ជាអគ្គនាយកកម្មវិធីប្រកួតបវរកញ្ញាឯកភពផែនដីកម្ពុជា ឆ្នាំ ២០១៩ និង ឆ្នាំ ២០២០។
មុនបោះជំហានលើវិថីសិល្បៈ ដើមឡើយ រំដួលលិចទឹក មានក្តីស្រមៃចង់ធ្វើជាវេជ្ជបណ្ឌិត តែក្រោយមកបែរជាមកជាប់ជំពាក់ចិត្តនឹងជំនាញតុបតែងមុខវិញ។ នៅក្នុងឆ្នាំ ២០១៥ លោកចាប់ផ្តើមហ៊ានតុបតែងខ្លួនប្លែកៗ បន្ទាប់ពីបានចូលធ្វើការជាអ្នកផាត់មុខ និង រៀបចំម៉ូដឱ្យទស្សនាវដ្តីហ្វេហ្សិនឈានមុខមួយនៅកម្ពុជា។ គ្រានោះ លោកក៏ទទួលបានការចាប់អារម្មណ៍ខ្លាំងលើបណ្តាញសង្គម តាមរយៈការតុបតែងខ្លួនចម្លងស្ទីលឱ្យដូចទៅនឹងតារាហូលីវូដ ជាពិសេស រូបលើប្រអប់ម្សៅផេសាត់ ដែលមានទេពធីតាកាន់សត្វព្រាប។
ក្រោយផ្ទុះប្រជាប្រិយភាព រំដួលលិចទឹកបានផ្លាស់ប្តូរគំនិត ពីការចម្លងស្ទីលពីគេ ងាកមកបង្កើតអ្វីដែលជាស្ទីលរបស់ខ្លួនវិញ។ លោកបានប្រើប្រជាប្រិយភាពជាការផ្សព្វផ្សាយមានប្រយោជន៍ដូចជា៖ ការបង្ហាញ ការក្រើនរម្លឹក និង ជាសារអប់រំផ្សេងៗ ឬរម្លឹកអនុស្សាវរីយ៍ចាស់ៗជាមួយវត្ថុប្រើប្រាស់ពីអតីតកាល បង្កើតជាការស្លៀកពាក់តុបតែងបែបសហសម័យ លាយឡំនឹងការថតលេងទឹកមុខបែបកំប្លែងៗ។ កាលនោះការតែងខ្លួនផ្ទុះការចាប់អារម្មណ៍ខ្លាំងមានដូចជា៖ ឈុតធ្វើពីមួកការពារសុវត្ថិភាព, ឈុតធ្វើពីសំរាមថង់ផ្លាស្ទិក និង ឈុតធ្វើពីក្រមាជាដើម។
ជាមួយការបង្កើតសិល្បៈច្នៃប្រឌិត រំដួលលិចទឹកបានលះបង់ទាំងពេលវេលា កម្លាំងកាយចិត្ត រួមទាំងថវិកាផ្ទាល់ខ្លួនជាច្រើន។ លោកធ្វើវាដោយក្តីស្រឡាញ់ ដើម្បីសិល្បៈវប្បធម៌ ក៏ដូចជាប្រទេសជាតិ។
កាលពីឆ្នាំ ២០១៦ រំដួលលិចទឹកទទួលបានអាហារូបករណ៍ផ្នែកសិល្បៈ និង វប្បធម៌ជាតិ ពីអង្គការសិល្បៈខ្មែរអមតៈ។ បន្ទាប់ពីនោះមក លោកបានបង្កើតកម្មវិធីមហោស្របសិល្បៈ និង បរិស្ថាន ដោយមានការចូលរួមពីសិល្បករបួនរូបទៀតដូចជា អ្នកនាង ហៀក ភារី, អ្នកនាង សួស ស៊ីណាត, លោក អាន់ រស្មី , និង លោក អ៊ូ ប៊ុនថង។
លើសពីនេះ រំដួលលិចទឹកក៏រមែងបង្កើតកម្មវិធីសប្បុរសធម៌ ដើម្បីប្រមូលមូលនិធិសាងសង់សាលារៀន ជួយសិស្សក្រីក្រ ជនក្រីក្រ ជួយលើកកម្ពស់ជីវភាពសហគមន៍ និង កម្មវិធីមួយចំនួនទៀត ដែលជាផ្នែកជួយផ្សព្វផ្សាយស្នាដៃសិល្បករខ្មែរជើងចាស់ និង ជាន់ថ្មី ដែលមិនទាន់មានឱកាសបានបង្ហាញ។
យ៉ាងណាមិញ ប៉ុន្មានឆ្នាំចុងក្រោយនេះ រំដួលលិចទឹក ហាក់ស្ងប់ស្ងាត់ លែងសកម្មលើបណ្តាញសង្គមដូចមុន។ បើតាមប្រភពមួយចំនួន អ្នកខ្លះថាលោកមមាញឹកនឹងការងារផ្ទាល់ខ្លួន ឯខ្លះទៀតថាលោកកំពុងមានជំងឺ ដែលតម្រូវសម្រាកព្យាបាលរយៈពេលយូរ៕
