មហាជនអ្នកគាំទ្រតាមដានរបស់ពិធីការិនី ផេនខេក បានជ្រាបហើយពីរឿងរ៉ាវជីវិតឯកជន និង ការតស៊ូរបស់នាងកន្លងមក បន្ទាប់ពីបានជួបព្យុះភ្លៀងជីវិតបន្តបន្ទាប់ ទាំងរឿងរ៉ាវស្នេហា ទាំងរឿងលុយកាក់ផុងខ្លួនជំពាក់បំណុលគេ នាងក៏នៅប្រឹងស៊ូក្រោកឈរខំធ្វើការរកស៊ីដោះស្រាយមិនគៀចវេសទៅណា។
យ៉ាងណា ស្របពេលជីវិតសឹងតែធ្លាក់ដល់ចំណុចសូន្យនោះ កញ្ញា ផេនខេក ក៏ទទួលរងសម្ពាធផ្លូវចិត្ត និង ការបាក់ទឹកចិត្តខ្លាំងដែរ ប៉ុន្តែនាងក៏ពុំបានបោះបង់ខ្លួនឯង ខណៈទទួលបានការជួយលើកទឹកចិត្តពីមនុស្សទីស្រឡាញ់ជាច្រើន ធ្វើឱ្យនាងកាន់តែមានកម្លាំងតស៊ូជម្នះគ្រប់បញ្ហា និង ធ្វើឱ្យជីវិតមានពន្លឺឡើងមកវិញ។
មកដល់ពេលនេះដែរ ឃើញថាជីវិតឯកជនរបស់តារាភេទទី ៣ រូបនេះ ហាក់មានភាពប្រសើរជាងមុន ខណៈទទួលបានការជួយជ្រោមជ្រែងពីមនុស្សជុំវិញខ្លួន និង ជីវិតសិល្បៈក៏កាន់តែមានទីផ្សារខ្លាំង ដែលទទួលបានការអាណិតស្រឡាញ់ពីបណ្ដាញអ្នកគាំទ្រជាច្រើន ដែលចូលចិត្តលើសមត្ថភាពសិល្បៈរបស់នាង។
លើសពីនេះ ថ្មីៗកន្លងទៅ តាមរយៈកិច្ចសម្ភាសមួយ ផេនខេក ក៏បានរៀបរាប់ទាំងអារម្មណ៍រំភើបពីជីវិតខ្លួន ដ្បិតតែនៅលំបាកមិនទាន់ធូរធារមែន តែនាងថាខ្លួនមានសំណាង ព្រោះមានមនុស្សជុំវិញខ្លួនជួយមើលថែគ្រប់សប់លើការងារសិល្បៈរបស់នាង មានទាំងអ្នកផាត់មុខ ធ្វើសក់ មាន Manager មានជំនួយការផ្ទាល់ខ្លួន មានអ្នកដើរតាម មានអ្នកមើលថែ ដូចទៅនឹងតារាហាយសូរម្នាក់អ៊ីចឹង ប៉ុន្តែតាមពិតសុទ្ធសឹងតែជាការជួយដោយក្ដីស្រឡាញ់ចេញពីចិត្តប៉ុណ្ណោះ ដែលនាងពុំបានចំណាយថវិកាចំពោះពួកគេឡើយ៕
សូមចុចទីនេះដើម្បីទស្សនាវីដេអូ៖
