ពីមួយថ្ងៃទៅមួយថ្ងៃ កញ្ញា កុយ អេនណា កាន់តែអង្រួនចិត្តអ្នកគាំទ្រជាមួយនឹងរូបភាព ក៏ដូចជាវីដេអូតុបតែងខ្លួនលេងស្ទីលថ្មីៗ បង្ហោះលើគណនីហ្វេសប៊ុក មិនដែលឱ្យសាំភ្នែកអ្នកគាំទ្រឡើយ ដែលរាល់ការលេងស្ទីលតែងខ្លួនរបស់នាង សុទ្ធតែមានភាពលេចធ្លោ និង ទាក់ភ្នែកមហាជនជានិច្ច។
អ្វីដែលកាន់តែចាប់អារម្មណ៍ និង គួរឱ្យសរសើរខ្លាំងចំពោះ ខណៈគេសង្កេតឃើញថារាល់សកម្មភាព ក៏ដូចជារូបភាពថ្មីៗជាច្រើនដែលនាងបានថតបង្ហាញពីកន្លែងមួយទៅកន្លែងមួយសុទ្ធសឹងតែរំលេចនូវសម្បត្តិវប្បធម៌ និង ទេសចរណ៍ខ្មែរ ដែលនាងបង្ហាញពីគោលបំណងចង់ចូលរួមជាចំណែកមួយជួយផ្សព្វផ្សាយពីវប្បធម៌ និង វិស័យទេសចរណ៍ជាតិផងដែរ។
បើចាប់អារម្មណ៍ពីរូបសម្រស់វិញ កុយ អេនណា កាន់តែទទួលបានការសរសើរខ្លាំងពីមហាជនជាមួយរូបរាង ពណ៌សម្បុរ កាន់តែស្រស់ស្អាតបែបខ្មែរអង្គរ ជាពិសេសពេលនាងស្លៀកពាក់បែបខ្មែរសាមញ្ញៗនៅតំបន់ទេសចរណ៍ផ្សេងៗឆក់បានក្រសែភ្នែកអ្នកគាំទ្រខ្លាំងទាំងខ្មែរ និង ជនបរទេស។
លើសពីនេះ មួយរយៈក្រោយឃើញថារាល់រូបភាព ក៏ដូចជាវីដេអូរបស់នាងតុបតែងខ្លួនបង្ហាញរូបសម្រស់ស្អាតៗបែបស្រអែមស្រស់នោះ ត្រូវបានអ្នកគាំទ្រសរសើរមិនដាច់ពីមាត់លើសម្បុររបស់នាង ថែមទាំងចាត់ទុកនាងជាអាយដលក្នុងចិត្តដែលបានជំរុញចិត្តឱ្យអ្នកគាំទ្រជាច្រើនស្រឡាញ់ចូលចិត្តចង់បានសម្បុរដូចនាង ជាពិសេសអ្នកដែលមានសម្បុរស្រដៀងនាងកាន់តែមានភាពជឿជាក់ស្រឡាញ់សម្រស់ខ្លួនឯងជាងមុនទៀតផង៕
