កាលពីយប់ថ្ងៃទី ២៥ ខែកញ្ញា ឆ្នាំ ២០២៥ ម៉ោងនៅក្នុងប្រទេសកម្ពុជា មហាជននិយមតាមដានតារាចម្រៀង N.John កូនប្រុសទី ២ របស់ឧកញ៉ា ព្រាប សុវត្ថិ បាន និង កំពុងចាប់អារម្មណ៍នូវការបង្ហោះរូបភាព អមនឹងសំណេរប្រកាសពីការចេញចម្រៀងថ្មីរបស់លោក។ ក្នុងនោះដែរ ចម្រៀងថ្មី ដែលនឹងចេញនៅថ្ងៃទី ២៦ ខែកញ្ញា ឆ្នាំ ២០២៥ នេះ គឺមានចំណងជើងថា «Feel Like This»។
ក្នុងការប្រកាសនូវការចេញចម្រៀងថ្មីនោះដែរ អ្វីដែលកំពុងផ្ទុះការចាប់អារម្មណ៍នោះ គឺការបញ្ចេញមតិវែកញែកទៅកាន់តារាចម្រៀងប្រុសរូបនេះជាថ្មី ពាក់ព័ន្ធនឹងការទម្លាក់បទចម្រៀងហាក់ចៃដន្យចំពេលវេលា ដែលព្រំដែនកម្ពុជាកំពុងឡើងកម្តៅជាថ្មីជាមួយនឹងប្រទេសថៃ។
យ៉ាងណាមិញ ទន្ទឹមនឹងការបង្ហាញការមិនពេញចិត្តក្នុងការបញ្ចេញចម្រៀងថ្មីរបស់លោក N.John នៅពេលនេះដែរ គេក៏ឃើញមានមហាជនទាំងក្មេងចាស់ប្រុសស្រីមួយចំនួន បានចូលទៅបញ្ចេញមតិវិជ្ជមានដូចគ្នាដែរ ដោយខ្លះលើកឡើងថា លោក N.John គឺជាសិល្បករជ្រកក្រោមផលិតកម្មបរទេស ដូច្នេះរាល់ការងារ និង សកម្មភាពរបស់លោកលើបណ្តាញសង្គមនានា សុទ្ធសឹងតែមានកាលវិភាគ និង ការរៀបចំរបស់អ្នកគ្រប់គ្រង។ ម្យ៉ាងវិញទៀត អ្នកគាំទ្រជាច្រើនក៏បានបញ្ចេញមតិថា គួរតែលើកទឹកចិត្តដល់លោក ខណៈពេលនេះ លោកកំពុងតែបង្ហាញកម្ពុជាទៅកាន់ឆាកអន្តរជាតិ។
ដោយឡែក ក្នុងការបញ្ចេញមតិនោះដែរ ក៏មានអ្នកបានបង្ហាញអារម្មណ៍មិនសុខចិត្តចំពោះការបញ្ចេញមតិមិនល្អទៅកាន់លោក N.John ដោយខ្លះប្រើពាក្យមិនសមរម្យ ប្រមាថដល់ក្រុមគ្រួសាររបស់លោក ដោយលើកឡើងថា មានសិល្បករខ្លះបង្ហោះវីដេអូ សើចសប្បាយក៏មាន ជេរប្រទេចគ្នាក៏មាន ប៉ុន្តែមិនមានអ្នកទៅហាស្តីឱ្យ បែរជាចាប់កំហុសតែលោក N.John ទៅវិញ៕
