បើចាប់អារម្មណ៍លើស្មារតីស្នេហាជាតិរបស់តារាច្រៀងស្រី ពេជ្រ សូលីកា ឃើញថារយៈពេលជាង ១ សប្ដាហ៍កន្លងទៅនេះ នាងបានបង្ហាញសកម្មភាពយ៉ាងសកម្មក្នុងការចូលរួមប្រើសំឡេងផ្សព្វផ្សាយប្រឆាំងនឹងការឈ្លានពានពីប្រទេសថៃ ដើម្បីទាមទារយុត្តិធម៌ សន្តិភាព និង ភាពស្អាតស្អំសម្រាប់កម្ពុជា តាមរយៈបណ្ដាញសង្គមផ្ទាល់ខ្លួន និង កម្លាំងសាមគ្គីនៃមហាជនកម្ពុជាដើរដំណើរថ្មើរជើងសន្តិភាព។
លើសពីនេះ អ្នកនាង ពេជ្រ សូលីកា ក៏ដូចជាក្រុមអ្នកសិល្បៈជាច្រើន បានបន្តសកម្មភាពដំណើរថ្មើរជើងសន្តិភាពតាមទីតាំងផ្សេងៗជាបន្តបន្ទាប់ទាំងក្នុងក្រុងភ្នំពេញ និង លើទឹកដីខេត្តសៀមរាប ដើម្បីបង្ហាញការគោរពអរគុណប្រមុខថ្នាក់ដឹកនាំកម្ពុជា និង គោរពដឹងគុណដល់បងប្អូនកងទ័ពជួរមុខ ដែលបានលះបង់ និង ពលីជីវិតដើម្បីមាតុភូមិ។
មកដល់ពេលនេះ ងាកមើលហ្វេសប៊ុករបស់តារាចម្រៀងស្រីរូបនេះ ក៏បានឃើញនាងបន្តសកម្មភាពចុះទៅតាមបណ្ដាខេត្តជាប់ព្រំដែនម្ដង ដើម្បីចូលរួមផ្ដល់ជំនួយជាមួយសប្បុរសជន នាំយកស្បៀងអាហារ សម្ភារៈផ្សេងៗជូនបងប្អូនកងទ័ពជួរមុខ និង គ្រួសារភៀសសឹកតាមទៀតផង៕
