ថ្មីៗនេះ មហាជនអ្នកប្រើប្រាស់បណ្ដាញសង្គមហ្វេសប៊ុក បាននាំគ្នាសម្ដែងក្ដីសោកស្ដាយ និង ចូលរួមរំលែកទុក្ខ បន្ទាប់ពីបានឃើញការបង្ហោះរបស់បុរសម្នាក់ដែលបានបាត់បង់កូនជាទីស្រឡាញ់ទាំងនៅក្នុងផ្ទៃម្ដាយ ជាមួយនឹងការរៀបរាប់យ៉ាងឈឺចាប់ដោយសារការមិនយកចិត្តទុកដាក់ពីសំណាក់គ្រូពេទ្យនៅមន្ទីរពេទ្យបង្អែកខេត្តតាកែវ។
បុរសបង្ហោះសារខាងលើត្រូវបានគេស្គាល់ឈ្មោះគណនីហ្វេសប៊ុក Vong SoPheak។ ម្ចាស់គណនីនេះបានបង្ហោះសាររៀបរាប់យ៉ាងឈឺចាប់កាលពីថ្ងៃទី ១៧ ខែកុម្ភៈ ឆ្នាំ ២០២៥ កន្លងទៅ ឱ្យបានដឹងថា ៖ «ជួយ shares ម្នាក់មួយផងបងប្អូន ឱ្យថ្នាក់គ្រប់គ្រងខាងមន្ទីរពេទ្យបង្អែកខេត្តតាកែវបានឃើញផង កាលពីថ្ងៃទី ១៣ ខែកុម្ភៈ ឆ្នាំ ២០២៥ ប្រពន្ធខ្ញុំបាទបានឈឺពោះឆ្លងទន្លេ ពេលនោះខ្ញុំបានដឹកប្រពន្ធទៅសម្រាលនៅមន្ទីរពេទ្យបង្អែកខេត្តតាកែវ ពេលនោះមន្ទីរពេទ្យបានទុកអ្នកជំងឺចោលមិនព្រមជួយ។ អ្នកជំងឺឈឺពោះចាប់តាំងពីយប់ថ្ងៃទី ១១ ខែកុម្ភៈ ឆ្នាំ ២០២៥ គាត់ទុកអ្នកជំងឺចោលរហូតដល់ថ្ងៃទី ១៣ ខែកុម្ភៈ ឆ្នាំ ២០២៥ អ្នកជំងឺទ្រាំលែងបាន រហូតដល់ស្លាប់កូនក្នុងផ្ទៃនៅក្នុងមន្ទីរពេទ្យ»។
ម្ចាស់គណនីខាងលើបានបន្តថា ៖ «ក្រោយពីបានដឹងកូនក្នុងផ្ទៃបានស្លាប់ ក្រុមគ្រួសារអ្នកជំងឺបានសុំឱ្យក្រុមគ្រូពេទ្យជួយវះកាត់ដើម្បីជួយសង្រ្គោះម្តាយ តែគាត់មិនព្រម រហូតដល់មានការប្រកែកគ្នាមួយ ប្រហែលកន្លះម៉ោង ទើបគ្រូពេទ្យព្រមវះកាត់ឱ្យ»។
ស្របគ្នានេះនឹងកើតរឿងនេះហើយ ប្រភពម្ចាស់គណនីដដែលបានសួរសំណួរមួយថា ៖ «តើអ្នកប្រើប័ណ្ណ ប.ស.ស ដូចពួកខ្ញុំកាត់លុយរាល់ខែ ហេតុអ្វីពេលចូលពេទ្យបង្អែកមួយនេះ បែរជាមិនយកចិត្តទុកដាក់ ហើយទុកអ្នកជំងឺចោលបែបនេះ។ លេងសើចនឹងជីវិតមនុស្សពេកហើយ តើការប្រើប័ណ្ណ ប.ស.ស ទាល់តែមានខ្សែទើបគ្រូពេទ្យព្រមមើល យកចិត្តទុកដាក់មែនទេ? ចុងក្រោយ ខ្ញុំសុំឱ្យលោកគ្រូ/អ្នកគ្រូមេត្តាកុំយកជីវិតមនុស្សមកលេងសើចអី! បើសិនជារឿងនេះកើតលើគ្រួសារលោកគ្រូ/អ្នកគ្រូវិញ តើគាត់គិតម៉េចដែរ? ហើយការប្រើប័ណ្ណ ប.ស.ស នេះ ក៏ទើបតែជួបដែរ ធ្លាប់តែឮគេនិយាយ ឥឡូវជួបហើយដូចគេនិយាយមែន ចូលពេទ្យគេមិនអើពើទេ អរគុណ»៕
