បន្ទាប់ពីបង្ហើបចង់ប្រឡូកចូលវិស័យបវរកញ្ញាក្នុងឆ្នាំ ២០២៥ ថ្មីៗនេះ តារាស្រី សុគា គីមលាង ហៅ Kon Ant បានធ្វើឱ្យមហាជនអ្នកគាំទ្រផ្ទុះចាប់អារម្មណ៍ និង ភ្ញាក់ផ្អើលខ្លាំង ខណៈទទួលដំណឹងថានាងត្រូវបានជ្រើសរើសក្លាយជាម្ចាស់តំណែងថ្មីនៃ Universal Woman Cambodia 2025 នឹងត្រៀមតំណាងកម្ពុជាប្រកួតលើឆាកអន្តរជាតិ។
នេះបើតាមរយៈហ្វេសប៊ុកផេក Universal Woman Cambodia បានបង្ហោះប្រកាសជាផ្លូវការនៃម្ចាស់តំណែងថ្មីប្រចាំឆ្នាំ ២០២៥ នេះថា ៖ «សេចក្តីប្រកាសជាផ្លូវការណ៍ Universal Woman Cambodia ២០២៥ កញ្ញា សុគា គីមលាង (Kon Ant) ជានាដការីរបាំបុរាណខ្មែរ ត្រូវបានគ្រងតំណែងជា Universal Woman Cambodia ២០២៥ ដែលនឹងត្រូវតំណាងឱ្យកម្ពុជាចូលរួមប្រកួត Universal Woman ២០២៥ នៅឯប្រទេសឥណ្ឌានាពេលឆាប់ៗខាងមុខនេះ»។
ក្រោយទទួលដំណឹងនេះដែរ មហាជនលើបណ្ដាញសង្គម ជាពិសេសអ្នកគាំទ្ររបស់តារាស្រីល្បីឈ្មោះ Kon Ant បានបង្ហាញការអបអរ និង គាំទ្រពេញចិត្តខ្លាំង ដែលមើលឃើញពីសមត្ថភាពរបស់នាង រំពឹងអាចនឹងទទួលបានលទ្ធផលល្អក្នុងដំណើរចូលរួមប្រកួតលើឆាកអន្តរជាតិនៃកម្មវិធីដ៏អស្ចារ្យនេះ៕
