ក្រោយពីមានករណីទាហានថៃ ៣ នាក់បានដើរជាន់គ្រាប់មីនតំបន់មុំបី កាលពីថ្ងៃទី ១៦ ខែកក្កដា ឆ្នាំ ២០២៥ កន្លងទៅ ពេលនេះខាងភាគីថៃបានមានលេសជាថ្មី មកចោទថាកម្ពុជាថាដាក់គ្រាប់មីនបង្កឱ្យមានការគំរាមកំហែងដល់អាយុជីវិតទាហានរបស់ខ្លួន។
ក្នុងនោះដែរ ទាំងប្រជាជនថៃ និង ក្រុមបាតុករក្នុងប្រទេស បាននាំគ្នាតវ៉ាឱ្យរដ្ឋាភិបាលចេញមុខថ្កោលទោសកម្ពុជាចំពោះរឿងនេះ ទាំងដែលមិនមានភស្តុតាងណាមួយបញ្ជាក់ថាកម្ពុជាជាអ្នកដាក់ឡើយ។ ទាក់ទងនឹងករណីនេះ មេទ័ពភូមិភាគ ២ Boonsin Padklang បានឱ្យដឹងថា ខ្លួនបានបញ្ជូនអង្គភាពកម្ចាត់ចោលអាវុធផ្ទុះ (EOD) ចុះទៅធ្វើកោសល្យវិច្ច័យទៅកន្លែងកើតហេតុ ដើម្បីពិនិត្យមើលប្រភេទគ្រាប់មីន ហើយបើគ្រាប់មីននោះទើបតែមានការបង្កប់ថ្មីមែន លោកនឹងព្រមឆ្លើយតបដោយនឹងផ្ញើលិខិតទៅប្តឹងតវ៉ានៅអង្គការសហប្រជាជាតិតែម្តង។
ដោយឡែក តាមការត្រួតពិនិត្យលើកដំបូង មេទ័ពភូមិភាគ ២ ថា គ្រាប់មីនទាំងនោះជាគ្រាប់ចាស់ៗសល់ពីសមរភូមិ ប៉ុន្តែក្រោយមកក៏ថាជាគ្រាប់មីនថ្មី តែគេរង់ចាំការបញ្ជាក់ឱ្យច្បាស់លាស់សិន។ បើសិនវាជាគ្រាប់មីនថ្មីមែន ថៃអះអាងថានឹងផ្ញើលិខិតតវ៉ាទៅកាន់អង្គការសហប្រជាជាតិ (UN) តាមនីតិវិធី ហើយនៅតំបន់នោះត្រូវតែបង្កើនក្រុមល្បាត និង មានវិធានការតបតច្បាស់លាស់ចំពោះឧបទ្ទវហេតុនេះ៕
ប្រភព៖ Thairath
