នៅព្រឹកថ្ងៃទី ១៧ ខែតុលា ឆ្នាំ ២០២៥ នេះ មហាជន និង មិត្តទាំងក្នុង ក្រៅសិល្បៈជាច្រើន បានបង្ហាញអារម្មណ៍យ៉ាងក្តុកក្តួល បន្ទាប់ពីលោក ព្រហ្ម ប្រសិទ្ធី និង លោក ខៀវ សម្បត្តិរិទ្ធី មិត្តរួមអាជីព លោក ណាឃីម បានប្រាប់ដំណឹង លោក ណាឃីម ត្រៀមបញ្ជូនមកកម្ពុជាវិញ។
ក្នុងនោះ តាមរយៈ លោក ព្រហ្ម ប្រសិទ្ធី និង លោក ខៀវ សម្បត្តិរិទ្ធី បានឱ្យដឹងថា វេជ្ជបណ្ឌិតនៅមន្ទីរពេទ្យវៀតណាម ឱ្យក្រុមគ្រួសារ និង មិត្តភក្តិត្រៀមចិត្តឱ្យហើយ ព្រមទាំងកំពុងរៀបចំឯកសារបញ្ជូនលោក ណាឃីម មកកាន់ស្រុកកណើតវិញ។
យ៉ាងណាមិញ នៅវេលាម៉ោងប្រមាណជាង ១ រសៀល តាមរយៈ ការបង្ហោះលើគណនីហ្វេសប៊ុករបស់លោក ខៀវ សម្បត្តិរិទ្ធី នូវរូបភាព ២ សន្លឹក អមនឹងសំណេរដ៏ខ្លីរបស់សិល្បករបុរាណ និង ជាមិត្តស្និទ្ធស្នាលរបស់លោក ណាឃីម បានធ្វើឱ្យមហាជនក្តុកក្តួលយ៉ាងខ្លាំង ដោយពេលនេះ លោក ណាឃីម បានបញ្ជូនឡើងឡានពេទ្យត្រៀមចេញមកប្រទេសកម្ពុជាវិញហើយ។ ក្នុងនោះ លោក ខៀវ សម្បត្តិរិទ្ធី បានរៀបរាប់ថា៖ «បងអើយ! យើងទៅស្រុកកំណើត ដែនដី ស្រុកខ្មែរយើងវិញហើយណា បងឃីម»។
មកដល់រសៀលថ្ងៃទី ១៧ ខែតុលា ឆ្នាំ ២០២៥ នេះ ជាដំណឹងដ៏សោកសៅ ដោយសិល្បករបុរាណដ៏មានសមត្ថភាពរូបនេះ បានទទួលមរណភាពហើយ៕
សូមចុចទីនេះ ដើម្បីទស្សនាវីដេអូ៖
