នារីម្នាក់មានជំងឺចម្លែក បង្អត់អាហារខ្លួនឯង ហូបតែផ្លែឈើមួយថ្ងៃមួយពេល រហូតធ្លាក់ខ្លួនស្គមរីងរៃនៅសល់តែ ២២ គីឡូ

សារព័ត៌មានបរទេស បានរាយការណ៍ពីការស្លាប់របស់នារីជនជាតិប៉ូឡូញម្នាក់ ដោយសារតែការបង្អត់អាហារខ្លួនឯង បរិភោគត្រឹមតែផ្លែឈើមួយថ្ងៃមួយពេល រហូតធ្លាក់ខ្លួនស្គមរីងរៃនៅសល់តែ ២២ គីឡូក្រាម។

តាមព័ត៌មានបានឱ្យដឹងថា នារីខាងលើនេះឈ្មោះថា Karolina Krzyzak ជាជនជាតិប៉ូឡូញ វ័យ ២៧ ។ នាងបានធ្វើដំណើរមកស្នាក់នៅសណ្ធាគារមួយកន្លែងនៅលើកោះបាលី ប្រទេសឥណ្ឌូនេស៊ី។ ខណៈមកដល់ទីនេះ សុខភាពនាងបានអន់ថយជារឿយៗ គឺមានរូបរាងស្គមស្គាំងយ៉ាងខ្លាំង រីឯស្បែកលឿងស្ងួត មើលទៅឃើញសុទ្ធតែឆ្អឹង និងដើរលែងចង់រួច ហើយបុគ្គលិកសណ្ឋាគារបានព្យាយាមនាំនាងទៅមន្ទីរពេទ្យដែរ តែនាងតែងតែបដិសេធ។

លុះបីថ្ងៃក្រោយមក មិត្តរបស់នាងក៏បានខលមកសួរដំណឹងរបស់នាងពីបុគ្គលិកសណ្ឋាគារ ដោយសារតែទាក់ទងនាងមិនបានសោះ។ បុគ្គលិកក៏បានចូលទៅមើលក្នុងបន្ទប់របស់នាងក៏ឃើញថានាងសន្លប់បាត់ស្មារតី ហើយក្រោយមកនាងក៏បានបាត់បង់ជីវិត ដោយមូលហេតុគឺការខ្វះសារធាតុអាហារធ្ងន់ធ្ងរ។ យ៉ាងណាមិញ Karolina មានជំងឺធុញអាហារតាំងតែនៅវ័យជំទង់ ទើបក្រោយមកនាងក៏ប្តូររបបអាហារមកជាបរិភោគផ្លែឈើសុទ្ធសាធ រហូតបង្ក​ឱ្យមានការខ្វះសារធាតុអាហារ ទាល់តែបាត់បង់ជីវិតបែបនេះ៕