សម្ភារនិយមថ្លៃៗ របស់ទំនើបៗ បានកំពុងធ្វើឱ្យមនុស្សបច្ចុប្បន្នជ្រួលជ្រើម រហូតអ្នកខ្លះលទ្ធភាពមិនដល់ សុខចិត្តជាប់បំណុល ជ្រើសរើសវិធីបង់រំលោះឱ្យតែបានយកមកហ៊ឺហា សម្ញែង ឬ ហាយសូរនឹងគេ។ បំណុលងាយនឹងបង្កើត ប៉ុន្តែមុននឹងធ្វើវា ត្រូវដឹងថា តើបំណុលនោះ ជាបំណុលល្អ ឬ បំណុលអាក្រក់។
បើតាមការចែករំលែករបស់ អ្នកឧកញ៉ាបណ្ឌិត យូ សាម៉េត បំណុលមានពីរ គឺ បំណុលល្អ និង បំណុលអាក្រក់។ លោកបានពន្យល់ជាឧទាហរណ៍យ៉ាងដូច្នេះ ៖ «បើយើងខ្ចីលុយគេមកដើម្បីទិញឡាន យកឡានមកបង្អួតគេ វាជាបំណុលអាក្រក់។ តែបើខ្ចីលុយគេទិញឡានទៅរត់តាក់ស៊ី ឬ យកមករត់ឈ្នួល ឬ ជួលឱ្យគេ វាជាបំណុលល្អ។ មួយវិញទៀត បើខ្ចីលុយគេយកទៅធ្វើផ្ទះសំណាក់ ធ្វើផ្ទះជួល ឱ្យកម្មកររោងចក្រ វាជាបំណុល្អ»។
លោកបាននិយាយសង្កត់ទៀតថា ៖ «មនុស្សដែលគ្រោះថ្នាក់បំផុត គឺ ហាយសូរ អត់មានតែខំធ្វើមាន អ្វីៗកើតចេញពីខ្មាសគេ។ ខ្មាសមិត្តភក្តិខ្លាចណាស់ ចុះហេតុអ្វីខ្មាសធនាគារ ម៉េចមិនខ្លាច?»។
លោកបន្តទៀតថា ៖ «គាត់ឃើញក្រុមគ្រួសារគាត់ មិត្តភក្តិគាត់មានឡាន លុយគេទិញខ្លួនគេ គេមានប្រាក់ខែគ្រប់គ្រាន់ ហើយគេទិញលុយសុទ្ធ គេមិនទិញរំលោះ។ ចំណែកគាត់វិញ ខ្លាចខ្មាសគេ ឡានខ្លួនឯងមានជិះសោះ ទៅដូរយកស៊េរីថ្មី បង់រំលោះ។ គាត់គិតថាប្រាក់ខែថេរ ៥ រយដុល្លារ ឬ ១ ពាន់ដុល្លារ គិតថាអស្ចារ្យ ចុះបើគេឈប់ឱ្យធ្វើការ ឬ គេបញ្ឈប់ត្រូវគិតយ៉ាងម៉េច? ក្រុមហ៊ុនខ្លួនឯងនៅក្ស័យធន ចុះទម្រាំធ្វើការឱ្យគេ?»។
អ្នកឧកញ៉ាបណ្ឌិត យូ សាម៉េត ថា បំណុល្អមិនជាថ្វី តែបើបំណុលអាក្រក់ ខ្ចីពីមួយដាក់មួយ ហើយបើខូច CBC (ខូចឈ្មោះក្នុងប្រព័ន្ធឥណទាន) នឹងលែងខ្ចីធនាគារបានហើយ។ ដល់ខ្ចីធនាគារលែងបាន ចាប់ផ្តើមទៅខ្ចីឯកជន ការប្រាក់កាន់តែថ្លៃ ចុងក្រោយជំពាក់ជុំទិស ក្ស័យខ្លួនឯង៕
