ក្មេងប្រុសវ័យ ១៣ ឆ្នាំម្នាក់ មានម្ដាយជាខ្មែរ និង ឪពុកចុងជាជនជាតិថៃ ទៅរស់នៅរៀនសូត្រនៅថៃតាំងពីតូច សុខៗត្រូវអាជ្ញាធរទៅចាប់ដល់សាលា ត្រៀមបញ្ជូនមកខ្មែរវិញ

ថ្មីៗនេះមានរឿងរ៉ាវដ៏គួរឱ្យរំជួលចិត្តមួយ ដែលមានក្មេងប្រុសវ័យ ១៣ ឆ្នាំម្នាក់ ដែលធំធាត់ឡើងរៀនសូត្រនៅថៃតាំងពីកំណើត ត្រូវអាជ្ញាធរទៅចាប់ខ្លួនដល់សាលា ថាចូលមករស់នៅខុសច្បាប់ ហើយនឹងត្រៀមបញ្ជូនត្រឡប់មកកម្ពុជាវិញ។

រឿងរ៉ាវមួយនេះ ត្រូវបានចែកចាយដោយគ្រូបង្រៀនរបស់ក្មេងប្រុសខាងលើនេះផ្ទាល់ ដោយក្នុងនោះគ្រូបានឱ្យដឹងថា ក្មេងប្រុសនេះជាជនជាតិខ្មែរ មានម្តាយជាខ្មែរ តែមានឪពុកចុងជាជនជាតិថៃ ហើយបានមករស់នៅក្នុងប្រទេសថៃតាំងពីតូចមកម្ល៉េះ គឺគេបានធំធាត់នៅក្នុងប្រទេសថៃ និងបានរៀនសូត្រភាសាថៃ។ ក្រោយពីមានរឿងរ៉ាវទំនាស់កើតឡើងរវាងកម្ពុជា-ថៃមួយរយៈធំ នៅព្រឹកថ្ងៃទី ២៨ ខែសីហា ឆ្នាំ ២០២៥ នេះ ស្រាប់តែមានប៉ូលិសចុះមកចាប់ខ្លួនក្មេងប្រុសខាងលើដល់សាលា ដោយចោទថាបានចូលមករស់នៅក្នុងប្រទេសថៃដោយខុសច្បាប់ ដែលធ្វើឱ្យក្មេងប្រុសយំឱបគ្រូយ៉ាងគួរឱ្យអាណិតអាសូរ។

យ៉ាងណាមិញ តាមព័ត៌មានបានឱ្យដឹងថា ក្មេងប្រុសរូបនេះ រួមទាំងម្តាយ ត្រូវបានប៉ូលិសកំពុងឃុំឃាំងនៅក្នុងប៉ុស្តិ៍ ដោយរងចាំត្រៀមចាប់ជនជាតិខ្មែរឱ្យគ្រប់ ១០ នាក់សិន នឹងធ្វើការបញ្ជូនត្រឡប់មកកម្ពុជាវិញ។ ដោយឡែក ពេលនេះគ្រូរបស់ក្មេងប្រុសខាងលើ កំពុងតែព្យាយាមទាក់ទងទៅខាងអាជ្ញាធរពាក់ព័ន្ធផ្សេងៗ ដើម្បីជួយក្មេងប្រុសខាងលើនេះ៕

ប្រភព៖ Khaosod