ថ្មីៗនេះ Gun Jompalang ដែលជា Influence ល្បីខាងជួយសង្គមនៅក្នុងប្រទេសថៃ បាននឹកឃើញយកឡានបូមលាមកចំនួន ១៤ គ្រឿង មកដោតទង់ជាតិថៃដោយក្តីមោទកភាព ហើយជិះហែហមមកត្រៀបត្រាពេញព្រំដែន ក្នុងបំណងចង់បាញ់ទឹកលូទាំងនោះមកលើប្រជាជនខ្មែរដែលកំពុងតវ៉ាការពារទឹកដីភូមិស្រុករបស់ពួកគេ នៅភូមិអូរបីជាន់។
យ៉ាងណាមិញ ទង្វើដ៏អសីលធម៌របស់ Gun Jompalang មិនត្រឹមតែទទួលការប្រទេចផ្តាសាពីប្រជាជនខ្មែរយ៉ាងច្រើននោះទេ តែក៏មានអ្នកនយោបាយមួយចំនួនក្នុងប្រទេសថៃ បានចេញមុខមករិះគន់យ៉ាងច្រើនដូចគ្នា ទើបធ្វើឱ្យ Gun កើតការអាក់អន់ស្រពន់ចិត្ត និងផុសសារវែងអន្លាយនៅតាមបណ្តាញសង្គមរបស់ខ្លួន។
Gun Jompalang បានផុសសារបង្ហាញពីអារម្មណ៍ថា ខ្លួនពិតជាខកចិត្តខ្លាំងណាស់ នៅពេលដែលជនជាតិខ្មែរជេរប្រមាថខ្លួន គ្មានឃើញអ្នកនយោបាយណាចេញមុខមកការពារនោះទេ ហើយគ្រាន់តែយកឡានបូមលាមកទៅចត មិនទាន់ទាំងបាញ់អស់មួយដំណក់ផង ស្រាប់តែមានអ្នកមករិះគន់។ ខ្លួនបានជួយនៅជាយដែនជាង ៣ ខែហើយ មិនឃើញមានអ្នកនយោបាយណាសរសើរមួយម៉ាត់សោះ តែខ្លួនក៏នៅតែខំជួយនៅជាយដែន និងសង្គមជាមួយអ្នកគាំទ្ររហូត៕
